پاکستان نا فلسطینی الس تون یکجہتی نزور مفروک ءِ،نائب وزیراعظم و وزیر خارجہ

نیویارک، نائب وزیراعظم و وزیر خارجہ محمد اسحاق ڈار فلسطینی الس تون پاکستان نا نزور مفروک یکجہتی نا درشانی ءِ کرسا غزہ و دیکی کنڈ انا حالیت آتیا گڑتی نا درشانی ءِ کرینے و پارینے کہ ایلم و شریدار ملک آتا کمک اٹ فلسطینی کاز ءِ مونی دننگ و جہانی کانودی اصول آتا رداٹ فلسطین نا ویل انا انصاف اٹ و آخبتی ایسر نا مونی دننگ کن کاریم ءِ برجاتخنہ، غزہ نا پوسکن تفنگ و حکمرانی نا بست بند بایدے فلسطینی کماشی ٹی مرے ہرافتے ٹی فلسطینی اتھارٹی نا بنجائی کڑد مرے۔ او دا خیال آتا درشانی ءِ سے شنبے نادے ا اقوام متحدہ نا جنرل اسمبلی نا 81 می دیوان نا وخت آ فلسطین نا بابت او آئی سی ”کمیٹی آف سکس” نا دیوان آن تران کرسا کرے۔ نائب وزیراعظم و وزیر خارجہ اسحاق ڈار او آئی سی کن سیکرٹری جنرل نا امنائی سلاہ اٹ گچین کاری آ اسماعیل شیخ محمد ءِ مبارکبادی تس۔ او فلسطینی الس تون پاکستان نا نزور مفروک یکجہتی نا درشانی ءِ کرے۔ او غزہ و دیکی کنڈ انا حالیت آتیا گڑتی نا درشانی کرے۔ او غزہ جھیڑہ نا ایسر نا جوان ڈٹ آعملدرآمد ءِ مونی دننگ کن امریکہ، مصر، قطر و ترکیہ نا ثالثی نا کوشست آتا ستا ءِ کرے۔ ہرادے اقوام متحدہ نا سلامتی کونسل نا قرارداد 2803 نا رداٹ پک کننگانے۔ نائب وزیراعظم و وزیر خارجہ مسجد اقصیٰ/الحرم الشریف اٹی اسرائیل نا کنڈآن برجا خلاف ورزی تا ترند ی اٹ مذمت ءِ کرے۔ او مقبوضہ بیت المقدس نا دے ٹکی بشخ اتون اوار دیکی کنڈ اٹ کانود آن چَپ آبادکاری نا کاریم، آبادکار آتا بیداد و الحاق نا بابت گام گیج آتیا ہم گڑتی نا درشانی ءِ کرے۔ او او آئی سی نا کنڈآن پوسکن و گچین سفارتی کارروائی آ زور شاغا۔ نائب وزیراعظم و وزیر خارجہ غزہ امن ڈٹ و سلامتی کونسل نا قرارداد 2803 آ پورو و سِخت اٹ عملدرآمد نا گرج آ زور شاغا۔ او پارے کہ غزہ نا پوسکن تفنگ و حکمرانی نا بست وبند بایدے فلسطینی کماشی ٹی مرے، ہرافتے ٹی فلسطینی اتھارٹی نا بنجائی کڑد مرے، و جہانی کانود و جہانی انسانی کانود نا خلاف ورزی تیا پرسجو نا خواست کرے۔ او 1967 آن مست انا سیم تا بنداو آ اسہ آجو، وتواجہ فلسطینی ریاست نا جوڑ مننگ، ہرا نا دارالحکومت القدس الشریف مرے، و فلسطین نا اقوام متحدہ نا پورو رکنیت کن پاکستان نا مخ تفی نا درشانی ءِ کرے۔ او پارے کہ ساڑی حالیت او آئی سی و اونا باسک ملک آتا کنڈآن پوسکن و گچین سفارتی کارروائی نا خواست کیک۔ ”کمیٹی آف سکس” ءِ دا اولیت آتے کن تینا کوشست آتے بایدے برجا تخے، اول مسجد اقصیٰ/الحرم الشریف و القدس اٹی کل اسلامی و مسیحی مقدس جاگہ غاتا تاریخی و کانودی حیثیت نا رکھ ءِ کننگ، ارٹمیکو مقبوضہ فلسطینی علاقہ غاتتون اوار دے ٹکی القدس اٹی اسرائیل نا کانود آن چَپ آبادکاری ٹی ودکی، الحاق پسند گام گیج، آبادکار آتا بیداد و زور اٹ کشنگ ءِ مسترد کننگ، سوئم: غزہ امن ڈٹ و سلامتی کونسل نا قرارداد 2803 آ پورو و دیانتدارانہ عملدرآمد نا مخ تفی ءِ کننگ، چہارم: دا ہیت ءِ پک کننگ کہ غزہ ٹی پوسکن تفنگ و حکمرانی نا بست وبند بایدے فلسطینی کماشی ٹی مرے و فلسطینی اتھارٹی نا بنجائی کڑد مرے، پنجم: جہانی کانود و جہانی انسانی کانود نا خلاف ورزی تیا پرسجو نا مخ تفی ءِ کننگ ششم، اقوام متحدہ و ایلو جہانی فورم تیافلسطینی الس نا رکھ و جہانی کانود نا عملداری کن او آئی سی نا باسک ملک آتا نیام اٹ رابطہ کاری ءِ سوگو کننگ و گڈسر اٹ، اسہ پتدار پدی ہننگ و پک کروک وخت انا سیاسی عمل نا کنڈ آ پدریسہ جہانی کوشست آتے برجا تخنگ، ہراٹی 1967ء آن مست انا سیم تا بنداو آ اسہ آجو، وتواجہ و جغرافیائی وڑ اٹ امنا کروک فلسطینی ریاست اس جوڑ مرے، ہرا نا دارالحکومت القدس الشریف مرے و اقوام متحدہ ٹی فلسطین نا پورو رکنیت نا مخ تفی ءِ ہم برجاتخنگے۔