پوسکنوڑ ویٹرنری ہسپتال آن مالدار آتے آسراتی دوئی مننگ ءِ،ڈاکٹر ربنواز سومرو

نصیرآباد، ڈسٹرکٹ لائیو اسٹاک آفیسر ڈاکٹر ربنواز سومرو پارینے کہ ضلع استامحمد اٹی پوسکنوڑ آسراتی تیان شپ ویٹرنری ہسپتال نا جوڑ مننگ آن علاقہ نا مالدار آتے تینا ساہدار تا درمان، تشخیص و سرجری تون اوار ایلو المی طبی آسراتیک ہندی کہول آ دوئی مننگ اٹی ءُ، ہراڑٓن اوفتے تینا ناجوڑ ساہدار تا درمان کن مر انگا علاقہ غاتیا ہنوئی تمپنگ ءِ۔ او پارے کہ تدوک آ دے تیٹی صوبائی وزیر لائیو اسٹاک سردارزادہ فیصل خان جمالی ڈپٹی کمشنر استامحمد محمد رمضان پلال و ایلو تعلقدار افسر آتتون اوار ضلع استامحمد نا علاقہ کوٹ نور محمد جمالی ٹی پوسکنوڑ ویٹرنری ہسپتال نا باقاعدہ بناءِ ءِ کرے، او پارے کہ دا پوسکنوڑ ویٹرنری ہسپتال نا پورو مننگ صوبائی وزیر لائیو اسٹاک سردارزادہ فیصل خان جمالی نا خاص کوشست و استخواہی نا بھرم ءِ‘ ہراڑان علاقہ نا مالدار آک بھاز خوش مسنو۔ ڈاکٹر ربنواز سومرو دا ہیت آتے ڈپٹی ڈائریکٹر ڈویژنل انفارمیشن ڈیپارٹمنٹ نصیرآباد نیک محمد تون ہیت و گپ کرسا پارے، او باوری کرفے کہ ضلع استامحمد اٹی جوڑ کروک دا پوسکنوڑ ویٹرنری ہسپتال نصیرآباد ڈویژن اٹی تینا وڑ انا جتاو اہم ءُ ادارہ اسے وخت اس کہ بلوچستان نا منہ پوسکنوڑ ویٹرنری ہسپتال آتیٹی حساب شمار مریک۔ او پارے کہ ہسپتال اٹی ساہدار تا ناجوڑی تا گچین تشخیص و درمان کن پوسکنوڑ ویٹرنری لیبارٹری، سرجیکل سیکشن، الٹراساؤنڈ سسٹم، ساہدار تا وزن کننگ نا پوسکنوڑ مشین و ایلو المی بشخ آک جوڑ کننگانو، ہراڑے ساہدار تے پوسکنوڑ طبی اصول آتا رِد اٹ درمان نا آسراتیک فراوان کننگ انگ ءُ، دا آسراتی تاسوب آن مالدار آتے تینا نہادی ساہدار تا درمان و ناجوڑی تا وخت آ تشخیص اٹی نمان کمک رسینگک۔ ڈاکٹر ربنواز سومرو پارے کہ او چین آن پی ایچ ڈی نا ڈگری دوئی کرینے و ساہدار تا چندی ناجوڑی تا تشخیص، درمان و پوسکنوڑ ویٹرنری وڑوڈول نا بابت علمی و عملی آزمودہ ارے کن تون۔