پاکستان مالدیپ تون تینا متکن و سنگتی تعلقداری تے بھاز اہمیت ایتک،اسپیکر سردار ایاز صادق

اسلام آباد، قومی اسمبلی نا اسپیکر سردار ایاز صادق تون مالدیپ نا پارلیمانی اسپیکر عبدالرحیم عبداللہ نا کماشی ٹی ڈل پارلیمنٹ ہاؤس اٹ اوڑدہی کرے، ہراٹی پاکستان و مالدیپ نا نیام اٹ پارلیمانی تعلقداری، تین پہ تینی کمکاری و پارلیمانی سفارت کاری آ گپ وتران کننگا۔ اوڑدہی ٹی ہڑتوم آ ملک آک پارلیمانی سفارت کاری ءِ پین سوگو کننگ نا ارادگی نا درشانی ءِ کریر۔ دا وخت آ ہیت وگپ کرسا قومی اسمبلی نا اسپیکر پارے کہ مالدیپ نا پارلیمانی ڈل انا دورہ ہڑتوم آ ملک آتا کانود جوڑ کروک ادارہ غاتا نیام اٹ رابطہ غاتے پین سوگو کیک۔ پاکستان مالدیپ تون تینا متکن و سنگتی تعلقداری تے بھاز اہمیت ایتک۔ پاک مالدیپ پارلیمانی فرینڈ شپ گروپ ہڑتوم آ ملک آتا تعلقداری تا مونی دننگ اٹ اہم کڑد ادا کننگ ءِ۔ قومی اسمبلی نا اسپیکر ڈل ءِ قومی اسمبلی نا اہم پارلیمانی گام گیج آتا بارواٹ معلومداری تس۔ قومی اسمبلی ٹی ینگ پارلیمانی فورمز، ایس ڈی جیز سیکرٹریٹ، ویمن پارلیمانی کاکس و چائلڈ رائٹس کاکس فعال کڑد ادا کننگ ءُ۔ قومی اسمبلی ٹی جینڈر مین اسٹریمینگ و ایلو پارلیمانی اصلاحات نا کمک اٹ جامع کانود سازی ءِ مون آ دننگ انگ ءِ۔ مالدیپ نا اسپیکر قومی اسمبلی نا اسپیکر سردار ایاز صادق نا خیرسگالی نا جوزہ غاتاستاءِ کرے و کیپ ٹاؤن اٹ قومی اسمبلی نا اسپیکر نا کنڈآن کمکاری آ اونا منت واری ءِ ہرفے۔ او پارے کہ مالدیپ پاکستان تون تینا ایلمی تعلقداری تے بھاز اہمیت ایتک۔ مالدیپ نا اسپیکر پاکستان آ بننگ آ جم وجوش اٹ بخیرکننگ آ قومی اسمبلی نا اسپیکر نا منت واری ءِ ہرفے۔ اوڑدہی ٹی پاک مالدیپ پارلیمانی فرینڈ شپ گروپ نا کنوینر شائستہ خان تون اوار قومی اسمبلی نا باسک آک ساڑی ئسر۔ اوڑدہی ٹی قومی اسمبلی نا باسک سیدہ نوشین افتخار، دانیال چوہدری، اسفندیار بھنڈارہ و آسیہ ناز تنولی تون اوار ایلو زالبول باسک آک ہم ساڑی ئسر۔