باوہ لمہ غاک تینا چناتے پولیو نا پڑی المی کنفر،وریندر لعل

نصیرآباد، ڈپٹی کمشنر نصیرآباد وریندر لعل چناتے پولیو کون آ ہلوک ناجوڑی آن بچفنگ کن چنا اسے پڑی کنفسا ضلع نصیرآباد اٹی پنچ دے ئی پولیو تور مہم نا باقاعدہ بناءِ کرے۔ دا وخت آ ڈسٹرکٹ ہیلتھ آفیسر نصیرآباد ڈاکٹر ایاز حسین جمالی و جہانی جانجوڑی ادارہ نا نمائندہ ڈاکٹر عبدالسمیع ہم چناتے پولیو آن بچفنگ نا پڑی کنفیر۔ دا وخت آ ڈپٹی کمشنر وریندر لعل پارے کہ پولیو نا پورو چٹفنگ حکومت نا اولیکو اولیت اٹی اوار ءِ و دا مسخت نا دوئی کننگ کن لمہ باوہ، سول سوسائٹی، عالم دین‘ استاد، میڈیا و راج انا کل تپہ غاتے تینا کڑد ءِ ادا کروئی تمک۔ او لمہ باوہ غاتیا زور شاغا کہ او پولیو ٹیم تتون پورو کمک کیر و تینا پنچ سال اسکان نا وئی انا کل چناتے پولیو آن بچفنگ نا پڑی المی کنفر۔ او پارے کہ پولیو تور مہم نا وخت آ جانجوڑی محکمہ نا ٹیمک مچ آ ضلع نا جتا علاقہ غاتیٹی ہرا اُراغا ہنسا پنچ سال اسکان وئی انا چناتے پولیو آن بچفنگ نا پڑی کنفرہ، پولیو ورکر آتا کنڈآن چناتے پڑی کنفنگ تون اوار لمہ باوہ غاتے پولیو آن بچفنگ و رکھی تدبیر نا بابت معلومداری ہم فراوان کننگک۔ ڈسٹرکٹ ہیلتھ آفیسر ڈاکٹر ایاز حسین جمالی پارے کہ مہم اٹ پولیو ٹیم تا کارکڑد نا چاروکی ءِ کننگک و دا ہیت ءِ پک کننگک کہ اسہ چنا اس ہم پولیو نا رکھی پڑی تیان محروم مف‘ او لمہ باوہ غاتیان خواست کرے کہ او تینا اُرا تیا بروک پولیو ٹیم تتون کمک کیرسا چناتے پولیو نا پڑی المی کنفر۔ ڈبلیو ایچ او نا نمائندہ ڈاکٹر عبدالسمیع ہم پولیو نا چٹفنگ کن برجا کوشست آتیٹی لمہ باوہ و راج انا کل تپہ غاتا کمک ءِ بھاز اہم گوندسا پارے کہ چناتے پولیو آن بچفنگ کن ہر مہم اٹی پنچ سال اسکان نا کچ کل چناتے پولیو نا پڑی کنفنگ المی ءِ۔