پاکستان نا جمہوری اسمبلی تیٹی کم و ود30 درسد ورنا نمائندگی کننگ ءُ،مینا مجید بلوچ

کوئٹہ + کیپ ٹاؤن، 69 می کامن ویلتھ پارلیمانی کانفرنس نا وخت آ بلوچستان نا ورنا صوبائی اسمبلی نا باسک و صوبائی سلاہکار گوازی و ورنا باندات مینا مجید بلوچ ایشیا ریجن نا ورناتا نمائندگی ءِ کرسا پاکستان و خاص وڑ اٹ بلوچستان نا ورناتا ویل، لائخی و آخبت نا گمان آتے جہانی پارلیمانی فورم آ تالان کرے۔ سویلی افریقہ نا شار کیپ ٹاؤن اٹ برجا69 می کامن ویلتھ پارلیمانی کانفرنس نا رداٹ 16 ستمبر آ اڈ ہلوک یوتھ راؤنڈ ٹیبل (Youth Roundtable) اٹ مینا مجید بلوچ ایشیا ریجن نا ورناتا نمائندگی ءِ کرے، راؤنڈ ٹیبل دیوان آن تران کرسا او ورناتا ویل، دوئی وارخواہی، اوفتا لائخی و آخبت نا گمان تیاگپ وتران کرے و فیصلہ سازی و پالیسی سازی نا عمل اٹ ورناتا گچین اواری نا گرج آ زور شاغا۔ مینا مجید بلوچ پارے کہ پاکستان نا جمہوری اسمبلی تیٹی کم و ود30 درسد ورنا نمائندگی کننگ ءُ، وخت اس کہ ملک انا 62 درسد آبادی ورناتیا تالان ءِ۔ پاکستان نا ورناک توانائی، لائخی و ارادگی آن شپ ءُ و ملک ءِ شونداری، شونہالی و روشنا آخبت نا کنڈآ ہننگ نا پبی لائخی تخرہ۔ او جہانی پارلیمانی برادری نا مون آ پاکستان و خاص وڑ اٹ بلوچستان نا ورناتا توار ءِ بڑز کرسا پارے کہ ورناتے پالیسی و فیصلہ سازی نا عمل اٹ جوان وارخواہی تننگ وخت انا اہم ءُ گرج اسے۔ کامن ویلتھ پارلیمانی کانفرنس دولت مشترکہ نا باسک ملک آتا پارلیمان تا اہم سالانہ جہانی پلیٹ فارم اسے، ہراڑے جتا جتا ملک آتا پارلیمنٹیرین، پارلیمانی کمامدار و پالیسی تون تعلقدار بندغ آک جہانی، پارلیمانی و راجی باندات آ گپ و تران کیرہ۔ برجاسال انا 69 می کانفرنس اٹ دولت مشترکہ نا جتا جتا پارلیمان تیان سد آ پارلیمنٹیرین، پارلیمانی اسٹاف و پالیسی سازو فیصلہ ساز آک شریک ءُ۔ جہانی پارلیمانی فورم آ بلوچستان آن تعلقدار اسہ ورنا زالبول باسک اسے ناکنڈآن ایشیا ریجن نا ورناتا نمائندگی و پاکستان و بلوچستان نا ورناتا ویل، لائخی و گمان تے تالان کننگ بلوچستان کن اسہ بھلو شرف اس گوندنگ انگ ءِ۔