آپریشن ردالفتنہ 3،آواران اٹی آپریشن، 3 دہشت گرد خلنگار،آئی ایس پی آر

کوئٹہ،، سیکورٹی فورس آک بلوچستان نا ضلع آواران نا علاقہ بدرنگ اٹی ‘آپریشن ردالفتنہ 3’ انا رداٹ انٹیلی جنس بیسڈ سرسہب کارروائی کرسا پیشن نا کاٹم خواجہی کروک ٹی کاریم کروک دہشت گرد ٹولی فتنہ الہندوستان نا 3 دہشت گرد ءِ دوزخی کریر۔ سیکورٹی حوالی نا رداٹ فتنہ الہندوستان نا دہشت گرد آتا کوزہ غان بھلو کچ اسے ٹی پوسکن خودکار سلہہ، منچر و تخریبی مواد دوئی کننگانے۔ حوالی پارینے کہ فورس آتا پدریسہ، گچین و ٹارگٹڈ آپریشن تیٹی صوبہ ٹی بے چیٹی تالان کروک دا دہشت گرد نیٹ ورک نا مخ ءِ پرغنگانے و اوفتا بھلو جانی و مالی نسخان اس مسنے۔ سیکورٹی فورس آک دا ارادگی نا درشانی ءِ کریر کہ بلوچستان اٹی مدامگی امن‘ الس نا جان و مال انا رکھ و ملک دشمن دہشت گرد و اوفتا کمک کروک آتا پورو چٹفنگ اسکان کارروائی بے سلنگ آن برجاسلک۔ بنجائی وزیر داخلہ محسن نقوی بلوچستان نا ضلع آواران اٹی آپریشن ردالفتنہ 3 نا رداٹ ’فتنہ الہندوستان‘ نا دہشت گرد آتا برخلاف سیکورٹی فورس آتا سرسہب کارروائی نا ستاءِ کرینے۔ اسہ بیان اسے ٹی وزیر داخلہ وخت آ کارروائی ٹی 3 دہشت گرد ءِ دوزخی کننگ آ سیکورٹی فورس آتا افسر و ورناتا بڑزکو کسبی لائخی تا ستاءِ کرسا پارے کہ دہشت گرد آتا پراگندہ ارادہ غاتے چٹفنگ آ او فورس آتے سلام پیش کیک۔ محسن نقوی پارے کہ بلوچستان اٹی آخبتی امن و سوگوی کن سیکورٹی فورس آتا بہادر گلزادہ غاک نزور مفروک ارادگی اٹ کاریم کننگ ءُ۔ او پیدوار کرے کہ ملک دشمن دہشت گرد و اوفتا کمکار آتا ماس آن پورو چٹفنگ مچ آ قوم نا امنائی توار ءِ۔ او پارے کہ وطن عزیز آن فتنہ و دہشت گردی نا ناچوڑر ءِ چٹفنگ نا دا جنگ اٹی مچ آ قوم اسٹ مرسا تینا بہادر سیکورٹی فورس آتتون ہم کوپہ سلوک ءِ۔