مکہ مکرمہ غا جلہو نا اخس کہ مذمت کننگے کم ءِ، مچ آدنیا نا مسلمان تا است ہسون مسنے،ترجمان دفتر خارجہ سجاد حیدر

اسلام آباد، پاکستان حوثی باغی تا مکہ مکرمہ نا مقدس ہند آتیا جلہو نا سخت انگا لوز آتے ٹی مذمت ءِ کرسا پارینے کہ دا جلہوک سعودی عرب نا وتواجہی، علاقائی سلامتی و مچ آ دنیا نا مسلمان تا مذہبی جوزہ غاے زہمی کننگ آنبار ءُ، پاکستان حرمین شریفین نا تقدس و دفاع کن سعودی عرب تون ہم کوپہ سلوک ءِ۔ ترجمان دفتر خارجہ سجاد حیدر خان ہفتہ وار پریس بریفنگ نا وخت آ پارے کہ پاکستان نیامی دے ٹِک اٹی حوثی جلہو آتا رد اٹ ودی مروک حالیت آتا خوڑتی اٹ جاچ ءِ ہلنگ اٹی ءِ۔ ترجمان مکہ مکرمہ نا مقدس ہند آتیا ڈرون جلہو نا کوشست و ریاض و مدینہ ٹی ایسٹ ویسٹ پائپ لائن آ جلہو نا سخت انگا لوز آتے ٹی مذمت ءِ کرسا پارے کہ دا جلہوک سعودی عرب نا وتواجہی، علاقائی سلامتی ءِ زہمی کرینو و مچ آ دنیا نا مسلمان تا است ءِ ہسون کرینو۔ ترجمان پارے کہ وزیراعظم شہباز شریف نا 13 ستمبر آ سعودی ولی عہد شہزادہ محمد بن سلمان تون ٹیلفون آ حوال مس۔ ہراٹی پاکستان حرمین شریفین نا تقدس و دفاع کن سعودی عرب تون ہم کوپہ سلنگ نا ارادہ نا دوارگی ءِ کرے۔ ترجمان دفتر خارجہ پارے کہ سعودی سلہہ بند فوج انا وخت آ و بہادری اٹ کارروائی آن جلہو ءِ بے سہب کننگ نا ستاءِ کینہ۔ نائب وزیراعظم اسحاق ڈار ہم دا جلہو تا سخت مذمت ءِ کرینے، پاکستان نا موقف ءِ کہ کل فریق آک زیات آن زیات سگ نشان ایتر و جھیڑہ ءِ ودفنگ آن پاناد کیر، حوثی تا گام علاقائی امن و سلامتی کن بھلو گڑتی اسے۔ ترجمان پیدوار کرے کہ 15 ستمبر آ خصوصی اقتصادی زون اٹی بھارتی بحری جہاز جہانی کانود و 1991ء نا ہڑتوم آ کنڈ آن معاہدہ نا خلاف ورزی ءِ کرسا پاکستانی بحری جہاز آن بھاز خڑک برسا خار تس حرکت اس کرے‘ ہرانا سوب آن ہڑتوم آ جہاز آک ڈوک لگار، پاکستان دا خارتس گام ءِ سخت اٹ مسترد کرسا نئی دہلی ٹی ہم پاکستانی ناظم الامور نا کمک اٹ بھارتی وزارت خارجہ ءِ ڈیمارش جاری کرینے، ترجمان پارے کہ لبنانی وزیر داخلہ نا دورہ ٹی وزیراعظم شہباز شریف لبنان نا وتواجہی و علاقائی سلامتی نا مخ تفی نا دوارگی ءِ کرے، داکان بیدس آرمینیا ٹی پاکستان نا اولیکو سفیر شفقت علی خان تینا سفارتی سند آتے پیش کرینے، کرتارپور راہداری و سکھ مرادوند آتا بابت ترجمان پیدوار کرے کہ پاکستان سکھ مرادوند آتے بخیر کننگ کن پورو وڑ اٹ تیار ءِ، وخت اس کہ سیم ءِ بند تخنگ نا کاریم بھارت نا کنڈ آن کننگانے، ترجمان پارے کہ اسلام آباد نیامی دے ٹِک اٹی ودوک آ چک و تاڑ نا بھاز سنجیدگی اٹ جاچ ءِ ہلنگ اٹی ءِ، ڈیہہ اٹی مدامگی امن و جھیڑہ غاتا ایسری کن پاکستان مدام سفارت کاری و پرامن مذاکرات نا مخ تفی ءِ کیک، او پارے کہ نائب وزیراعظم اسحاق ڈار جہانی ایٹمی توانائی ایجنسی نا سروک رافیل گروسی تون ٹیلفون آ گپ وتران کرے۔