سی فوڈ روزگار اٹ ودکی و ملکی برآمد آتے مونی دننگ اٹ کمکار مننگ کیک،صدر چیمبر آف کامرس گوادر

کوئٹہ، صوبائی حکومت بلوچستان نا زرکاری، صنعتی و واپاری سرجزآتا مونی دننگ و ملکی زرگزران ءِ سوگو کننگ نا پالیسی نا رداٹ گوادر ءِ سی فوڈ پروسیسنگ، ویلیو ایڈیشن و برآمدات نا اہم وت جوڑ کننگ نا کوشست آتیٹی پیش رفت مون آ بسنے۔ گوادر چیمبر آف کامرس اینڈ انڈسٹری نا صدر جیہند ہوت چین نا پنی آ فوڈ سپلائی چین گروپ (OIG) نا وائس پریذیڈنٹ بن بن یانگ تون اوڑدہی کرے، ہراٹی گوادر اٹ زرکاری، سی فوڈ پروسیسنگ، کولڈ چین، فوڈ لاجسٹکس و چینی مارکیٹ اسکان دراست رسینگ نا گمان تیا گپ وتران کننگا۔ اوڑدہی ٹی گوادر چیمبر نا سیکرٹری جنرل خالد سیف ہم ساڑی ئس۔ گوادر چیمبر آف کامرس اینڈ انڈسٹری نا ترجمان ساجد بن رحیم نا رداٹ جیہند ہوت پارے کہ گوادر ءِ بیرہ بندرگاہ آخابلکن پیداوار، پروسیسنگ، ویلیو ایڈیشن، واپارو برآمد آتا گچین ہند انا وڑ اٹ شونداری تننگ آن ہندی و درملکی زرکار آتے کن پوسکن وارخواہی ودی مننگ کیک۔ او پارے کہ بلوچستان نا گیشتر سمندری وسیلہ غاتے پوسکن فش پروسیسنگ، فریزنگ، کولڈ اسٹوریج، آب اٹ پیکیجنگ و ریفریجریٹڈ لاجسٹکس تون گنڈنگ آن جہانی، خاص وڑ اٹ چینی منڈی تسکان برآمد آتے ِ ودفنگ مریک۔ او پارے کہ چینی زرکار و کاروباری ادارہ غاتے گوادر اٹ سی فوڈ، کولڈ چین، فوڈ پروسیسنگ و لاجسٹکس نا بشخ آتیٹی زرکاری نا سلہ خلسا پارے کہ سی فوڈ ویلیو چین نا جوڑ کننگ آن ہندی ماہی گیر و کاروباری تپہ کن پوسکن وارخواہی، روزگار اٹ ودکی و ملکی برآمدات ءِ مونی دننگ مریک۔ اوڑدہی ٹی گوادر و چین نا نیام اٹ واپاری رابطہ غاتا مونی دننگ و پرائیویٹ بشخ انا شریداری اٹ زرکاری نا پوسکن آ ڈٹ آتیا پیش رفت نا گمان تا ہم جاچ ءِ ہلنگا۔