مکران یونیورسٹی پینل ڈسکشن نا اعلامیہ راستی آن چَپ ءِ، پھلین بلوچ

پنجگور، نیشنل پارٹی نا بنجائی راہشون، قومی اسمبلی نا باسک و قائمہ کمیٹی نا چیئرمین پھلین بلوچ مکران یونیورسٹی پنجگور نا انتظامیہ نا کنڈ آن تدوک آ دے تیٹی اڈ ہلوک پینل ڈسکشن نا اخیر اٹ جاری مروک پالیسی بیان آ سخت ردِ عمل نا درشانی ءِ کرینے، تینا اسہ وضاحتی بیان اسے ٹی پھلین بلوچ پارے کہ یونیورسٹی انتظامیہ نا کنڈ آن “پوسکن آ صوبہ غاک” نا سرحال آ اڈ تروک پینل ڈسکشن اٹی علمی و دلیل نا بنداو مروک آ تران آن چَپ پینل نا اخیر اٹ جاری مروک بیان اٹی کل پینلسٹ آتے پوسکن آ صوبہ غاتا مخ تف نشان تننگا‘ ہرا نئے بیرہ راستکی تیان چَپ ءِ بلکہ داڑان اوفتا پت ءِ ہم نسخان رسینگا، او پارے کہ پینل ڈسکشن اٹی مسہ پینلسٹ علمی، منطقی و مدلل وڑ اٹ پوسکن آ صوبہ غاتا جوڑ کننگ نا موقف نا مخالفت ءِ کریر، ولے یونیورسٹی انتظامیہ اوفتا موقف و دلیل آتے گوجالسا ہندن ءُ پالیسی بیان اس جاری کرے ہراڑان دا تاثر ودی مس کہ کل پینلسٹ آک پوسکن آ صوبہ غاتا مخ تف ءُ، او پارے کہ پنی آ علمی و تعلیمی ادارہ غان دا وڑ انا کارروائی نا اومیت تخنگ مفک‘ اگہ علمی ادارہ غاتیٹی سلاہ‘ اختلافِ رائے و دلیل اٹ کروک گپ وتران ءِ درست وڑ اٹ پیش کننگتو تو داڑان نئے بیرہ ادارہ نا کنڈہلپننگ و علمی حیثیت زہمی مریک بلکہ آخبت اٹی جتا جتا تپّہ غاتیان تعلقدار بندغ آک دا وڑ انا پروگرام آتیٹی بشخ ہلنگ آن مست سجفنگ آ بیوس مریرہ۔