پنجگور، بی ایس ڈی آئی ڈٹ انا رد اٹ 30 اسکول اوار کننگار

ڈپٹی کمشنر پنجگور جہانزیب بلوچ نا کماشی ٹی ڈسٹرکٹ ایجوکیشن گروپ نا دیوان اس اڈ ہلک، ہراٹی ضلع پنجگور اٹی تعلیم نا بشخ انا جم حالیت، برجا ڈٹ و تعلیمی ادارہ غاتتون تعلقدار کیہی باندات آتا جم جاچ ءِ ہلنگا۔ دیوان اٹی پاننگا کہ بی ایس ڈی آئی ڈٹ آتا رد اٹ 30 اسکول آتے اوار کننگانے، وخت اس کہ 70 شیلٹر لیس اسکول آتے ورلڈ بینک انا ڈٹ اٹی اوار کننگ انگ ءِ۔ داکان بیدس سرکاری اسکول آتیٹی خالی ایس ایس ٹی اسامی تے ایڈہاک بنداو آ پُر کننگ نا بابت پیشرفت نا جاچ ءِ ہلنگا۔ دیوان اٹی کلسٹر بجٹ نا کاریم اٹ اتنگ و خڑچ آتا جاست پاست کن جوڑ کروک انسپیکشن کمیٹی نا باندات آ ہم سجفنگا تاکہ کلسٹر بجٹ نا شفاف و بھرمی کاریم اٹ اتنگ ءِ پک کننگ مرے۔ ہندا وڑ بلوچستان ایجوکیشن فاؤنڈیشن نا رد اٹ چلینگوک اسکول آتا باقاعدہ چاروکی آ ہم زور شاغنگا تاکہ دا ادارہ غاتیٹی تعلیمی آب و آسراتی تا فراوانی ءِ گچین کننگ مرے۔ ڈپٹی کمشنر جہانزیب بلوچ تعلقدار افسر آتے پارت کرے کہ ضلع ٹی تعلیمی ادارہ غاتا کارکڑد، استاد آتا حاضری‘ طالب علم آتا حاضری و بنداوی آسراتی تا فراوانی ءِ پک کننگ کن بھرمی گام گیج کننگے۔ پنجگور (نامہ نگار)