پرائیویٹ بشخ اکن حکومت چندی بشخ آتیٹی اصلاحات کننگ ءِ، محمداورنگزیب

اسلام آباد، بنجائی وزیر خزانہ و بُنگکاری سینیٹر محمد اورنگزیب پارینے کہ پرائیویٹ بشخ ءِ زیات وارخواہی ملنگ و زرگزران اٹ پرائیویٹ بشخ انا گچین کڑد ءِ پک جوڑ کننگ کن حکومت چندی بشخ آتیٹی اصلاحات کننگ ءِ، اصلاحات، مالی باندات آتیٹی شفافیت و کاروبار اٹ آسانی نا گام گیج آتیان ملک انا زرگزران پین سوگو مریک۔ او دا ہیت ءِ پاکستان ہائی کمیشن لندن نا کنڈآن پاکستان انویسٹمنٹ راؤنڈ ٹیبل آن تران کرسا پارے ہراٹی لندن نا پنی آ زرکار و جہانی مالی ادارہ غاتا نمائندہ غاک بشخ ہلکر۔ بنجائی وزیر خزانہ و بنگکاری سینیٹر محمد اورنگزیب دیوان اٹ خاص انگا مہمان نا وڑ اٹ بشخ ہلک۔ گورنر اسٹیٹ بینک آف پاکستان جمیل احمد، وزیر خزانہ نا سلاہکار خرم شہزاد و برطانیہ ٹی پاکستان نا ہائی کمشنر ٹیپو عثمان اسک ہم دا وخت آ ساڑی ئسر۔ وزیر خزانہ سینیٹر محمد اورنگزیب پارے کہ پاکستان نا حکومت ملک انا زرگزران ءِ سوگو کننگ و مدامگی زرگزرانی شونداری کن پبی کوشست کننگ ءِ۔ او پارے کہ حکومت گچین بشخ آتیٹی اصلاحات کننگ ءِ تانکہ پرائیویٹ بشخ ءِ زیات وارخواہی ملے و او زرگزران اٹ پبی کڑد ادا کننگ کے۔ وزیر خزانہ پارے کہ حکومت نا مالی پالیسی نا گچین بھرم مونی بننگ ءِ۔ بجٹ نسخان اٹی کمتی بسنے، حکومتی کٹیاٹی ودکی مسنے و مالی و ادارہ ئی اصلاحات آتیٹی پیش رفت مسنے۔ سینیٹر محمد اورنگزیب پارے کہ حکومت سرکاری ادارہ غاتیٹی اصلاحات تون اوار اوار پرائیویٹائزیشن نا عمل ءِ ہم مونی دننگ ءِ۔ او پارے کہ توانائی نا بشخ اٹ اصلاحات، مالی باندات آتیٹی شفافیت و کاروبار اٹ آسانی نا گام گیج آتیان ملک انا زرگزران پین سوگو مریک۔ وزیر خزانہ پارے کہ زرگزرانی شونداری کن خراج نا بنداوءِ ودفنگ و خراج نا کانود آتیا پبی عملدرآمد المی ءِ۔ او پارے کہ خراج کمامدار آتا صوابدیدی واکداری تے چٹفنگانے و خراج نا باندات آتیٹی کس اسے تون خاص رعایت کننگ پننگ ءِ۔ ولے تنخواہ دار تپہ غا ہچ ءُ پوسکن ءُ ودکی خراج اس خلنگتنے۔