پاکستان موسمیاتی بدلی آن بھاز زہمی ملک آتیٹی اوار ءِ،اسپیکر قومی اسمبلی

اسلام آباد، قومی اسمبلی نا اسپیکر سردار ایاز صادق تون سویلی افریقہ نا قومی اسمبلی نا اسپیکر انجیلا تھوکزلے ڈیڈیزا اوڑدہی کرے۔ اوڑدہی دولت مشترکہ نا پارلیمانی ایسوسی ایشن (سی پی اے) نا 69 می کانفرنس نا وخت آ مس۔ قومی اسمبلی سیکرٹریٹ نا رداٹ اوڑدہی ٹی ہڑتوم آ کنڈآتا تعلقداری تے پین سوگو کننگ تون اوار اہم علاقائی و جہانی باندات آتیا گپ وتران مس۔ ہڑتوم آ اسپیکر آک واپار، زرکاری، سیل و سوات نا بشخ آتیٹی کمک و پارلیمانی رابطہ غاتے مونی دننگ آ امنا کریر۔ اسپیکر سردار ایاز صادق ہڑتوم آ ملک آتا پارلیمان آتا نیام اٹ کانود جوڑ کننگ‘ کمیٹی نظام و پارلیمانی آزموندہ غاتا تبادلہ نا گرج آ زور شاغا۔ اسپیکر سردار ایاز صادق پاکستان نا گرین پارلیمنٹ، پارلیمانی کاکسز و کمیٹی نظام ءِ گچین جوڑ کننگ کن ہرفوک گام گیج آتیان معلومدار کرے و پارے کہ گرین ہاؤس گیس آتا کشنگ اٹ پاکستان نا بشخ بیرہ 0.6 درسد ءِ، ولے پاکستان موسمیاتی بدلی آن بھاز زہمی ملک آتیٹی اوار ءِ۔ اوغان ڈغار ءِ پاکستان نا برخلاف دہشت گردی کن کاریم اٹ اتنگ انگ ءِ۔ اسپیکر سردار ایاز صادق کشمیر نا ویل انا پرامن ایسر کن پاکستان نا اصولی موقف نا درشانی ءِ کرے وپارے کہ جنگ کس اسے نا فائدہ ٹی اف، جھیڑہ غاتا ایسر ءِ مذاکرات و سفارت کاری نا کمک اٹ بایدے پٹنگے۔ پاکستان دے ٹک نیامی ٹی امن نا مونی دننگ کن تینا کوشست آتے برجا تخک۔ اسپیکر سردار ایاز صادق سویلی افریقہ نا اسپیکر ءِ پاکستان نا دورہ نا سلہ خلک۔ سویلی افریقہ نا اسپیکر پاکستان نا پارلیمانی ڈل ءِ بخیر کرے و سویلی افریقہ نا اسپیکر ہڑتوم آ ملک آتا پارلیمان آتا نیام اٹ رابطہ غاتے مونی دننگ کن مفاہمت نا یادداشت نا استخواہی نا درشانی کرے۔ سویلی افریقہ نا اسپیکر نا کنڈآن سویلی افریقہ نا پارلیمانی ڈل ءِ زوت پاکستان آ گدریفنگ نا باور کرفنگا۔ سویلی افریقہ نا اسپیکر اسپیکر سردار ایاز صادق ءِ سویلی افریقہ نا دورہ نا سلہ ہم خلک۔ ہڑتوم آ اسپیکر آک پاکستان و سویلی افریقہ نا نیام اٹ پارلیمانی تعلقداری تے پین سوگو کننگ نا ارادگی نا درشانی ءِ کریر۔