ویل آتا ایسری کن وسیلہ و اکداری تے شیفکو کہول آ گدریفنگ المی ءِ،وزیر مملکت خزانہ

اسلام آباد، وزیر مملکت خزانہ و بنگکاری بلال اظہر کیانی پارینے کہ ملک ءِ مون تروک بنداوی ویل آتا ایسر و گچین سروس ڈیلیوری کن بنجاو صوبہ غاتا اولیت آتے یکجا وسیلہ و واکداری تے شیفکوآ گدریفنگ المی ءِ، حکومت مشکل جہانی حالیت و بھلا زرگزرانی لوڈوتیان پدہم زرگزرانی سوگوی دوئی کرینے، زرگزران ءِ مونی دننگ اٹی پرائیویٹ بشخ انا کڑد بھاز اہمیت تخک۔ پنچ شنبے نادے آ داڑے لیڈرز اِن اسلام آباد بزنس سمٹ اٹی گپ وتران کرسا او پارے کہ ملک ءِ مون تروک ویل آک بیرہ زرگزران یا وزارت خزانہ اسکان کچ اٹ افس بلکن تعلیم، جان جوڑی، سکول آن پیشن چنا و جم طرز حکمرانی تون اوار چندی بشخ آتتون گنڈوک ءُو دا کل باندات آک اسہ ایلو تون گنڈوک ءُ۔ وزیر مملکت پارے کہ نظام ءِ الس ءِ گچین آب انا خذمت بایدے فراوان کننگے۔ پنجرہ ئی ویل آتا ایسری کن ملک انا جم حکمرانی نا وڑ انا نظام نا اول سرآن جاچ ءِ ہلنگ و اودے گچین جوڑ کننگ المی ءِ، حکومت نا اصلاحاتی پروگرام نا مسخت گورننس و خذمت نا فراوانی ٹی گچینی اتنگ ءِ۔ او پارے کہ پنجاب حکومت گڑاس بشخ آتیٹی نمان کاریم کرینے ولے او پارے کہ بنداوی آسراتی تا بابت داسہ ہم چندی ویل آک ساڑی ءُ و دا وڑ انا ویل آتے ہندی کہول آ گچین وڑ اٹ ایسر کننگ نا گرج ءِ۔ وزیر مملکت پارے کہ ملک انا ویل آتتون گچین وڑاٹ مون تننگ کن اِرا باندات بنداوی اہمیت تخرہ، ہرافتے ٹی بنجاو صوبہ غاتا نیام اٹ اولیت آتیٹی ہم گرنچی و وسیلہ و واکداری تے شیفکو کہول آ گدریفنگ اوار ءِ، اگہ بنجاو صوبہ غاک تینا اولیت آتے یکجا کپسہ تو کچ اٹنگا وسیلہ غاتا گچین کاریم اٹ اتنگ ءِ پک کننگ مشکل مریک، تدوک آ سال بنجانا شونداری بجٹ کم و ود اسہ ہزار ارب روپئی وخت اس کہ صوبہ غاتا شونداری وسیلہ غاک کم و ود 3.2 کھرب روپئی ئسر، ہندا وڑ جم وڑاٹ کم ود چار کھرب روپئی شونداری سرجزآتیکن دوئی ئسر۔