مکہ معاہدہ، فریق اسے آ جلہو مریک تو ایلو ملک آک وڑ و ڈَول پک کرسا عمل کیرہ،لیفٹیننٹ جنرل احمد شریف چوہدری

اسلام آباد، ڈی جی آئی ایس پی آر لیفٹیننٹ جنرل احمد شریف چوہدری پارینے کہ مکہ معاہدہ ٹی اوار اسہ فریق اسے آ جلہو مریک تو معاہدہ ٹی اوار ملک آک وڑوڈول پک کیرہ و ہموڑا عمل کیرہ۔ او پارے کہ پاکستان ڈیہہ اٹی امن و سوگوی نا کل آن بھلا مخ تف ءِ و سنگت ملک آتتون بریبر تعلقداری تا سوب آن بے کنڈ ہلوک و انصاف آ تالان خیرخواہ نا کڑد ادا کننگ اٹی ءِ۔ امریکہ و ایران ہڑتوم آتتون اسہ وخت آ جوان ءُ تعلقداری ارے، اسہ ملک اسے تون تعلقداریک ایلو نا نااستی تتون گنڈوک مفسہ۔ العربیہ ءِ تروک انٹرویو ٹی او پارے کہ پاکستان خیرخواہی و مذاکرات نا کمک اٹ مدامگی و سوگو امن نا خواہندار ءِ۔ لیفٹیننٹ جنرل احمد شریف چوہدری پارے کہ پاکستان نا امریکہ و ایران ہڑتوم آتتون تعلقداریک جوان ءُ و اسہ ملک اسے تون پاکستان نا تعلقداریک ایلو ملک اتون نااستی تتون گنڈوک مفسہ۔ اوپارے کہ پاکستان کل ملک آتتون تینا قومی فائدہ و تین پہ تینی شرف نا بنداو آ تعلقداری تے مستی دیک۔ ڈی جی آئی ایس پی آر مکہ معاہدہ نا بابت پارے کہ دا اناگت وڑاٹ ودی مروک حالیت اسے نا سوب آن اف بلکہ کیہی دہائی تیا تالان تاریخی و اسٹریٹجک تعلقداری تا باقاعدہ دروشم ءِ۔ او پارے کہ معاہدہ پورو وڑ اٹ دفاعی وڑ اناسے‘ و داٹی ملک اسے نا برخلاف بیدادی یا نیام تمنگ نا ہچ ءُ گڑاس اوار اف۔ او پارے کہ مکہ معاہدہ اجتماعی ڈیٹرنس آ تالان ءِ و دانا بنجائی مسخت علاقائی امن و سوگوی ءِ‘ معاہدہ نا آپریشنل ٹک آتے پبلک کننگ مفک انتئے کہ ہچ ءُ ملک یا فوج اس تینا دفاعی و آپریشنل ٹک آتے پبلک کپک۔ او پارے کہ معاہدہ نا آپریشنل ٹک آتے ہر مسٹ آ ملک آک پک کیرہ۔ وخت اس کہ معاہدہ ٹی ودکی نا فیصلہ ہم ہر مسٹ آ ملک آتا تین پہ تینی امنائی اٹ مریک۔ ڈی جی آئی ایس پی آر پیدوار کرے کہ مکہ معاہدہ غان چین اتون پاکستان نا تعلقداری تیا ہچ ءُ زہم اس تمپک و کل تعلقداریک اسہ ایلو تون تعلقداری تخرہ۔ او پارے کہ پاکستان و چین انا تعلقداریک اسٹریٹجک وڑاناءُ و مچ آ دنیا ءِ ین، ہر مسٹ آملک آتا خڑک تعلقداری تیان سماءِ‘ او پارے کہ مکہ معاہدہ ٹی ہچ ءُ دن ءُ ٹک اس اف ہرانا بنداو آ اودے “مسلم الائنس” گوندنگ مرے۔ علاقائی امن، سوگوی و بیدادی کپننگ آ پت تخوک استخواہی تخوک ملک آک آخبت اٹی داٹی اوار مننگ کیرہ۔ او پاکستان و سعودی عرب نا تعلقداری تے السی، جذباتی، ربیدگی و حکومتی کہول آ خڑک گوندسا پارے کہ حکومتِ پاکستان مہالو آن پیدوار کرینے کہ ہر ملک انا تینا جتا قومی فائدہ غاک مریرہ۔ او پارے کہ پاکستان نا مسخت علاقائی چک و تاڑ اٹی ودکی نا جاگہ غا مذاکرات، خیرخواہی و سفارتی کمک اٹ مدامگی امن ءِ شون تننگ ءِ۔ بھارت تون تعلقداری تا بابت ڈی جی آئی ایس پی آر پارے کہ پاکستان بریبری، وتواجہی نا شرف و بھارت نا کنڈ آن دہشت گردی نا چٹفنگ نا شڑت آ مذاکرات یا ہیت و گپ کننگ کیک۔ او مئی 2025ء نا چک وتاڑ نا ذکر ءِ کرسا پارے کہ پاکستان ہمو وخت آ پیدوار کریسس کہ اِرا ایٹمی واکدار آتا نیام اٹی عسکری مون پہ مون مننگ “گنوکی و اسٹریٹجک ہبلہ ئی” اسے۔