مکہ مکرمہ نا برخلاف لغور و گندہ انگا ڈرون جلہو نا کوشست ءِ اسُل منپنہ،وزیراعظم محمد شہباز شریف

اسلام آباد، وزیراعظم محمد شہباز شریف مقدس ہند مکہ مکرمہ نا برخلاف لغورو گندہ انگا ڈرون جلہو نا کوشست نا سخت انگا لوز آتے ٹی مذمت ءِ کرسا پارینے کہ پاکستان ایلم اسلامی ملک سعودی عرب نا وتواجہی و علاقائی سالمیت نا دفاع تون اوار اوار حرمین شریفین نا رکھ و تقدس کن مملکت تون ہم کوپہ و نزور مفروک وڑاٹ سلوک ءِ۔ چارشنبے نا دے آراجی رابطہ نا پلیٹ فارم ایکس آ بیان اٹ وزیرِاعظم پارے کہ پاکستانی الس دا خارتس گام آ غمزدہ و سخت گڑتی نا گواچی ءِ، دا مذمت نا قابل و بشخنگپروک گام آ ننا است آتیٹی ساڑی ڈکھیائی و و اضطراب ءِ بیان کننگ کن لوز آک گنج اس افس۔ او پارے کہ نن رائل سعودی سلہہ بند فوج انا گمان آن زیات سنبرینگوک مننگ‘ بہادری و کسبی لائخی تے سلام پیش کینہ ہراشجاعت اٹ دمدستی کارروائی کرسا داکوشست ءِ بے سہب کریر۔ وزیرِاعظم پارے کہ اسہ وار ولدا کل فریق آتیا زور شاغنہ کہ او زیات آن زیات تحمل نا درشانی ءِ کیر و پین بے چیٹی نا خطرہ غان پدی مریر، ننا ڈیہہ مہالوآن جھیڑہ غاتا سوب آن بھاز زیات نسخان ہرفینے، مدامگی امن نا دوئی کننگ کن مذاکرات و سفارت کاری اسٹ انگا عمل نا قابل کسر ءِ۔ او پارے کہ پاکستان ایلم اسلامی ملک سعودی عرب نا وتواجہی و علاقائی سالمیت نا دفاع تون اوار اوار حرمین شریفین نا رکھ و تقدس کن سعودی عرب تون ہم کوپہ نزور مفروک وڑاٹ سلوک ءِ، دا ہمو زمواری ءِ ہرادے ہر پاکستانی تینا است آن خڑک تخک۔