گورنمنٹ گرلز ہائی اسکول شمبے اسماعیل نا مسڑ طالب علم آتا گوادر پورٹ نا دورہ

گوادر، طالب علم آتے عملی تعلیم، مشاہدہ و پوسکنوڑ معلومداری تننگ نا حکومتی وژن نا رِد اٹ گورنمنٹ گرلز ہائی اسکول شمبے اسماعیل گوادر نا مسڑ طالب علم آتیکن گوادر پورٹ و سی بی سی بزنس سینٹر نا مطالعاتی دورہ کرفنگا۔ مطالعاتی دورہ نا مسخت مسڑ طالب علم آتے ٹی پٹ و پول، مشاہدہ و ہیل کننگ نا جوزہ ءِ بیدار کننگ تون اوار اوفتے گوادر نا زرگزرانی و واپاری اہمیت و آخبت نا وارخواہی تیان معلومدار کننگ ئس۔ پنی آ کاروباری شخصیت میر فاروق غفور کلمتی نا کمک و چاروکی ٹی اڈ تروک دا دورہ ٹی مسڑ طالب علم آک گوادر پورٹ انا جتاجتا بشخ آتا دورہ ءِ کریر و پورٹ انا سرجز، واپار و ملکی زرگزران اٹی اونا کڑد انا بابت معلومات دوئی کریر۔ دا مطالعاتی دورہ اسکول نا ہیڈمسٹریس بلقیس سلیمان نا کماشی ٹی مس۔ مسڑ طالب علم آک سی بی سی بزنس سینٹر نا ہم دورہ ءِ کریر، ہراڑے خلیل احمد اوفتے کاروباری سرجز، واپار و زرگزرانی وارخواہی تا بابت حوال تس۔