بلوچستان نا مسن تا لائخی تیا گمر ءِ، ورنا تے وارخواہی تروئی تمک،ڈاکٹر ربابہ خان بلیدی

کوئٹہ، صوبائی سلاہکار زالبول شونداری ڈاکٹر ربابہ خان بلیدی پارینے کہ بلوچستان نا ورناک خاص وڑ اٹ ننا مسنک بھاز لائخ ءُ، گوازی نا میدان تیٹی اوفتا سرسہبیک نئے بیرہ بلوچستان بلکہ پاکستان کن ہم گمر نا سوب ءُ۔ ورناتے اسپورٹس نا گچین وارخواہی و آسراتی فراوان کرسا اوفتا توانائی تے ملک و قوم انا خذمت کن کاریم اٹ اتنگ مننگ کیک۔ 7 می نیاڑی بلوچستان ووشو چمپین شپ 2026 نا گڈسری دود اٹی خاص انگا مہمان نا وڑ اٹ تران کرسا ڈاکٹر ربابہ خان بلیدی پارے کہ گوازی نا پڑک ورنا تیٹی تینے آ پت، نظم و ضبط، سگ و کماشی نا لائخی ودی کننگ نا گچین ءُ وڑ ءُ۔ بلوچستان نا ورناک جتا جتا گوازی تیٹی تینا لائخی تے منفینو و او قومی وجہانی کہول آ پاکستان نا پن ءِ روشنا کننگ نا پورو لائخی تخرہ۔ او پارے کہ ننا مسنک گوازی نا پڑ تے ٹی سرسہبی دوئی کرسا بلوچستان نا اسہ مثبت و روشنا ءُ دروشم اس دنیا نا مون آ پیش کننگ اٹی ءُ۔ اوفتا است بڈی و کاٹم خواجہی ننا کل انا زمواری ءِ۔ ڈاکٹر ربابہ خان بلیدی پارے کہ محکمہ زالبول شونداری زالبول و مسن تا آسودہی، اوفتا حق آتا رکھ، تعلیم، جانجوڑی، تینے آ پت و راج اٹی شرفدار و فعال کڑد اکن گام گیج کننگ اٹی ءِ۔ زالبول و مسن تے اسپورٹس تون اوار چندی بشخ آتیٹی مونی ہننگ نا بریبر وارخواہی فراوان کننگ صوبائی حکومت نا اولیت آتیٹی اوار ءِ۔ او پارے کہ محکمہ زالبول شونداری نا مسخت زالبول و مسن تے ہندن ءُ چاگڑد اس فراوان کننگ ءِ ہراڑے او تینا لائخی تے پورو وڑ اٹ کاریم اٹ اتنگ کیر۔ اسپورٹس نا سرجز آک مسن تے ٹی تینے آ پت، جسمانی جانجوڑی، نظم و ضبط و کماشی نا لائخی ودی کننگ اٹی اہم کڑد ادا کیرہ، ہندا سوب آن زالبول آتیکن اسپورٹس نا وارخواہی تیٹی ودکی المی ءِ۔ ڈاکٹر ربابہ خان بلیدی پارے کہ ہراتم بلوچستان نا ورنا اسپورٹس نا پڑ آ سرسہبی دوئی کیک تو دا سرسہبی نا خوشی مچ آ پاکستان نا خوشی مریک، انتئے کہ ننا ورناک ملک انا روشنا آخبت ءُ۔ او پارے کہ ووشو تون اوار ایلو گوازی تیٹی بلوچستان نا مسن تا ودوک آ بشخ ہلنگ اسہ مثبت و است بڈی نا سوب ءِ۔ ننا مسنک تینا سخت خواری، ارادگی و لائخی نا کمک اٹ دا پک کننگ اٹی ءُ کہ اوفتے اگہ جوان وارخواہی، ہیلکاری و آسراتی فراوان کننگے تو او نئے بیرہ بلوچستان بلکہ پاکستان نا پن ءِ ہم روشنا کننگ کیرہ۔