صوبائی حکومت الس نا ویل آتے ایسرکننگ کن گام گیج کننگ ءِ،سینیٹر سردار محمد عمر گورگیج

کوئٹہ، پاکستان پیپلز پارٹی بلوچستان نا صدر و سینیٹر سردار محمد عمر گورگیج، بنجائی ایگزیکٹو کمیٹی نا باسک ومسکوہی بنجائی وزیر سردار باز محمد خان کھیتران، کوئٹہ ڈویژن نا صدر خیر محمد ترین، لورالائی ڈویژن نا صدر رحمت اللہ کدیزئی، سردار سرور سلیمانخیل، احسان افغان اسک پارینو کہ پاکستان پیپلز پارٹی الس نا حق حکمرانی، آئین نا بالادستی و پارلیمنٹ نا سوگوی کن جہد کننگ ءِ، وزیراعلیٰ بلوچستان سرفراز بگٹی نا کماشی ٹی صوبائی حکومت الس نا ویل آتے ایسرکننگ کن وس انا کچ آ گام گیج کننگ ءِ، ناراض پارٹی کارندہ غاتتون اوڑدہی کرسا اوفتے پدی پارٹی ٹی اتینہ، کارندہ غاک تین پہ تینی اختلاف آتیان ایڑتر مرسا بلاول بھٹو زرداری نا کلہو ءِ الس اسکان سرکیر۔ دا ہیت ءِ او مسکوہی بنجائی وزیر سردار باز محمد خان کھیتران نا کنڈآن تروک سُوارہ غان تران کرسا کریر۔ دا وخت آ سید سعداللہ، ثناء اللہ جتک، میر نصیب اللہ شاہوانی، اختر بلوچ، امتیاز جتک، پیپلز لیبر بیورو نا صدر شاہجہان گجر، اسپورٹس اینڈ کلچر ونگ انا صدر شہزادہ کاکڑ، سردار سرور سلیمانخیل، الطاف گجر، سید ایوب آغا، نعمت لالہ، ایم ظاہر موسیٰ خیل، عبدالغفور جعفر، جہانگیر بلوچ، اشفاق بلوچ، ایم ظاہر موسیٰ خیل، انجینئر احسان اللہ، عبدالنبی، مٹھا خان عمرانی، عصمت اللہ تون اوار پیپلز پارٹی نا ڈویژنل صدر، جنرل سیکرٹری و صوبائی ایگزیکٹو نا باسک آک بشخ ہلکر۔ ترانکار آک پاریر کہ پاکستان پیپلز پارٹی غریب و نیامی تپہ نا جماعت ءِ و پارٹی مدام الس نا ویل آتے ایسر کننگ کن عملی گام گیج کرینے، داوخت آ بلوچستان اٹ پیپلز پارٹی نا سیوتی صوبائی حکومت الس نا ویل آتے ایسر کننگ کن دے و نن کاریم کننگ ءِ۔ او پاریر کہ پارٹی ٹی کارندہ غاک تمبہ نا حیثیت تخرہ، اوفتا روا ویل آتے ایسر کننگ کن وس انا کچ آ کوشست کننگ و پارٹی نا ہرا سنگت آک ناراض مرسا اُراتیٹی تولوک ءُ اوفتیا ہنسا اوفتے خوش کینہ و پارٹی ٹی دُوارہ فعال کینہ۔ او پاریر کہ شہید ذوالفقار علی بھٹو الس اٹی جمہوری شعور تالان کرے و ملک ءِ امنائی آئین 1973 نا ٹیکی تس و شہید گودی بے نظیر بھٹو آمریت نا برخلاف بہادری اٹ جہد کرسا السی حاکمیت نا بیرک ءِ بڑز تخا۔ شہید ذوالفقار علی بھٹو و گودی شہید بے نظیر بھٹو نا مشن ءِ اینو چیئرمین بلاول بھٹو زرداری، آصف علی زرداری، آصفہ بھٹو و فریال تالپور مونی دننگ ءُ۔ او پاریر کہ پارٹی ٹی اختلاف جمہوریت نا زیبائی ءِ، سیاسی اختلاف آتے اواری اٹ تولسا ایسرکننگک۔ او پاریر کہ پاکستان پیپلز پارٹی نا جیالہ غاک سیاسی اختلاف آتیان ایڑترمرسا چیئرمین بلاول بھٹو زرداری، شریک چیئرمین آصف علی زرداری، آصفہ بھٹو و فریال تالپور نا کلہو ءِ ہر اُرا اسکان سرکیر و الس تون حوال اٹ مریر۔