دہشت گردی نا برخلاف ہڑدے 200 انٹیلی جنس بیسڈ آپریشن نا ٹارگٹ ءِ،وزیر مملکت داخلہ طلال چوہدری

اسلام آباد، وزیر مملکت داخلہ طلال چوہدری پارینے کہ پاکستان ءِ نزور کننگ نا نا منظم سازش کننگ انگ اٹی ءِ۔ ملک ءِ دے ٹِکی و دیکی سیم تیان دہشت گردی نا چیلنج آک مون تروک ءُ۔ ٹیرر کرائم نیٹ ورک دہشت گردی کن آسراتی فراوان کننگ اٹی ءِ۔ بدبختی اٹ ٹیرر نیٹ ورک کرائم ءِ سیاسی مخ تفی دوئی ءِ۔ پریس کانفرنس آن تران کرسا او پارے کہ ملک اٹی دہشت گردی نا برخلاف ہڑدے کساس 200 انٹیلی جنس بیسڈ آپریشن کننگ انگ ءُ، ولے سیکورٹی سوب آتا سوب آن دا کارروائی تا گیشتری سرجم آتے پپبلک کننگ مفک۔ ولے او پارے کہ اسہ انٹیلی جنس بیسڈ آپریشن نا آڈیو، ویڈیو و ایلو شاہدیک ہم مون آ تخنگرہ۔ او پارے کہ پاکستان اٹی دہشت گردی و بے سوگوی نا کوشست آتیٹی اوغانستان اٹی ساڑی کڑدار نا شاہدیک مون آ بسنو۔ ملک ءِ دے ٹِکی و دیکی سیم آن دہشت گردی نا چیلنج مون تروک ءِ۔ دہشت گردی تون اوار منظم ٹیرر کرائم نیکسس ہم کارروائی تے آسراتی فراوان کننگ اٹی ءِ۔ اسمگلنگ، منشیات، گاڈی، پٹرولیم و سلہہ تا کانود آن چَپ سرکننگ دا وڑ انا نیٹ ورک نا بشخ ءُ،خت اس کہ دہشت گردی کن سلہہ نا فراوانی لس ڈوہدار آتیان بھلا منظم نیٹ ورک آتسکان سر مننگ اٹی ءِ۔ او پارے کہ پاکستان اٹی دہشت گردی ءِ منظم وڑ اٹ اسپانسر و مینیج کننگ نا بابت شاہدیک مون آ بسنو۔ آزاد کشمیر اٹی اسہ جے کے تنظیم ءِ شاہدی تا بنداو آ کالعدم گوندنگانے و اونا برخلاف جاست پاست و شاہدی تا مون آ بننگ نا عمل برجا ءِ۔ سوشل میڈیا غا مون آ بروک آ منہ آڈیو تے اے آئی جنریٹڈ گوندنگ نا بابت سوج ہم چست کننگاسس‘ طلال چوہدری پارے کہ اسمگل کروک آئل نا پٹرول پمپ آک سیاسی کمک آن بیدس چلینگ کپسہ‘ وخت اس کہ پاکستان نا کیہی ضلع و ڈویژن تیٹی کانودی گاڈی تا مون اٹ اسمگل کروک گاڈی تا کچ زیات ءِ۔ اسمگل کروک لگژری گاڈی تا کاروبار اٹی سیاسی مخ تفی و سیاسی کرائم نیٹ ورکنگ نا شاہدیک ہم مون آ بسنو۔ وزیر مملکت پارے کہ ٹیرر کرائم نیٹ ورک اٹی سیاسی تپہ تون اوار چندی بندغ آتا فائدہ غاک گنڈوک ءُ، ہندا سوب آن کاؤنٹر ٹیررزم ڈرائیو اٹی دا وڑ انا نیٹ ورک نا چٹفنگ بنداوی اہمیت تخک۔ او پارے کہ کاؤنٹر ٹیررزم ڈرائیو اٹی 20 آن زیات ٹِک آک اوار ءُ،خت اس کہ کانود آن چَپ پیٹرول پمپ، اسمگلنگ و منشیات تون اوار چندی کانود آن چَپ کاروبار ٹیرر کرائم نیٹ ورک ءِ مالی و لاجسٹک کمک فراوان کیرہ۔ او پارے کہ کاؤنٹر ٹیررزم ڈرائیو نا جاچ ءِ وزیر داخلہ ہر تو آ ہلیک وخت اس کہ وزیراعظم ہر مسٹ آن چار تو آن پد دا بابت دیوان کیک۔