پمز ہسپتال واقعہ، وزیرِ اعظم نا انکوائری رپورٹ آ گام گیج آتے مسہ تُو اٹی پورو کننگ نا پارت

اسلام آباد، وزیراعظم محمد شہباز شریف پمز ہسپتال اٹی فائر سیفٹی تون اوار نظام نا گچینی، اودے جہانی خواست آتتون ہم گرنچ کننگ و انکوائری رپورٹ نا رداٹ سلاہ ئی گام گیج آتے بروک آ مسہ تُو اٹی پورو کننگ نا پارت کرسا پارینے کہ پمز ہسپتال نا گچینی کن مریس مدی گام گیج آتیا تالان جامع لائحہ عمل اس ہم جوڑ کننگے۔ چارشنبے نادے آوزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی پمز ہسپتال نا گچینی کن لائحہ عمل آ دیوان اس مس، دیوان اٹی پمز جاست وپاستی رپورٹ و وزارت قومی جان جوڑی نا کنڈ آن پمز انا پرفارمنس آڈٹ نا جاچ ءِ ہلنگا۔ وزیراعظم پارت کرے کہ انکوائری رپورٹ اٹی سلاہ ئی گونڈ مدی گام گیج آتیا عملدرآمد ءِ بروک آ مسہ تُو اٹی پک کننگے، پمز ہسپتال اٹی گچینی و اودے جہانی خواست آتتون ہم گرنچ کننگ کن ہر وڑ انا گام گیج کننگے، فائر سیفٹی نا بابت نظام کن پی کے ایل آئی آن کمک و سلاہ ہلنگے۔ وزیراعظم پارے کہ ڈبلیو ایچ او نا رپورٹ اٹی ساڑی سلاہ تیا سجفسا اوفتیا عملدرآمد ءِ ہم پک کننگے، ہسپتال اٹی دارو تا فراوانی و آسراتی تے پورو مفت تننگ کن گام گیج آتے ہم لائحہ عمل نا بشخ جوڑ کننگے، پمز ہسپتال نا گچینی کن جوان شہرت تخوک ہیومن ریسورس ءِ تعینات کننگے، پمز ہسپتال نا گچینی کن مریس مدی گام گیج آتیا تالان اسہ جامع لائحہ عمل اس ہم جوڑ کننگے، پولی کلینک ہسپتال نا آڈٹ کرسا بے قاعدگی تے چٹفنگے و اونا اولسر ٹہیفنگ نا لائحہ عمل اس جوڑ کننگے۔ وزیرِ اعظم پارت کرے کہ سی ڈی اے اسلام آباد اٹی ساڑی کل سرکاری و پرائیویٹ ہسپتال آتیٹی فائر سیفٹی گام گیج آتیا عملدرآمد ءِ پک کے، سی ڈی اے و کل تعلقدار ادارہ غاک سرکاری و پرائیویٹ دفتر و ماڑی تیٹی فائر سیفٹی نا بابت آڈٹ ءِ پک کیر، کل دفتر و ماڑی تیٹی فائر سیفٹی گام گیج آتیا عملدرآمد ءِ پک کننگے۔ دیوان اٹی وزارت قومی جان جوڑی نا کنڈ آن پمز ہسپتال نا گچینی و اودے جہانی آب اتون ہم گرنچ کننگ کن گام گیج آتیا حوال تننگا۔ دیوان ءِ پاننگا کہ پمز ہسپتال نا پرفارمنس آڈٹ اٹی جاچ ہلوک انڈیکیٹرز آتیان 90 درسد نا امنا مفروک ہدف نا مون اٹ بیرہ 39.7 درسد کمپلائنس دو بس۔ دیوان ءِ پاننگا کہ پمز جاست وپاستی رپورٹ نا رداٹ 37 سلاہ ئی گام گیج آتیا زوت عملدرآمد پک کننگ انگ ءِ وخت اس کہ دیوان ءِ گونڈ، نیامی و مریس مدی گام گیج آتیا ہم حوال تننگا۔ دیوان اٹی بنجائی وزیر کانود اعظم نذیر تارڑ، احد خان چیمہ، عطاء اللہ تارڑ، سید مصطفی کمال، خصوصی کمکار مختار احمد بھرتھ و تعلقدار بڑزکو کمامدار آک بشخ ہلکر۔