پٹرولیم لیوی نا ایسری خوانہ، خیرات آخا، حکومت خواست آتے امنا کے،حافظ نعیم الرحمن

کراچی، امیر جماعت اسلامی حافظ نعیم الرحمن پارینے کہ پیٹرولیم لیوی نا ایسری المی ءِ خیرات آخا، حکومت ننا خواست آتے امنا کے۔ قوم عذاب نا گواچی ءِ و زرگزران بھس مننگ اٹی ءِ، حکومت تون مذاکرات نا اسہ پین ریسہ اس اینو بیگہ نا 6 بجہ غا مریک‘ جماعت اسلامی نا حکومت آن اسٹ انگا خواست پیٹرولیم لیوی نا چٹفنگ ءِ۔ میڈیا تون ہیت کرسا حافظ نعیم الرحمن پارے کہ حکومت پاہک کہ پٹرولیم لیوی چٹفنگ کن پیسہ ہراکان بریک‘ دا نا سوج کیک، نن حکومت ءِ وار وار پارینن کہ پیسہ ہراکان پورو مننگ کیک، ولے حکومت تون ننا موقف نا ورندی ٹی ہچ ءُ دلیل اس اف۔ او پارے کہ حکومت 1567 ارب روپئی لیوی مچ کرسا بیرہ 25 ارب روپئی نا ریلیف تننگ اٹی ءِ، حکومت خیرات بشخنگ نا جاگہ غا پٹرولیم لیوی ءِ چٹفے۔ حکومت مذاکرات اٹ رے تے کننگ نا کوشست کپ۔ اگہ خواست آک امنا کننگتوس تو مذاکرات ءِ چٹفنہ، مذاکرات چٹا تو ولدا روڈآتیا فیصلہ غاک مریرہ۔ حافظ نعیم الرحمن پارے کہ اسلام آباد مارچ آن پد حکومت ءِ ننا جہد نا اندازہ مسنے۔ حکومت الس ءِ قطار آتیٹی خلنگ نا نظام اس ٹہیفینے، حکومت نا لاک ڈاؤن نا فیصلہ ءِ نن مسترد کینہ، لاک ڈاؤن نا جاگہ غا پٹرولیم لیوی ءِ چٹفسا ویل ءِ ایسر کننگے۔ او پارے کہ دکاندار و پوریاگر آتیا زور شاغنگ نا نظام امنا کننگ مفک‘ پولیس دکان تے بند کرفنگ نا جاگہ غا تینا زمواری تے پورو کے۔ جماعت اسلامی نا امیر پارے کہ ڈیزل نا نہاد آتیٹی کمتی انتئے کننگتو؟ ٹرانسپورٹ، ٹریکٹر و ایلو بشخ آک ڈیزل آ چلینگرہ، پٹرولیم لیوی نا سوب آن ہر گڑا نا نہاد ودنگ اٹی ءِ۔ ہڑدے ئی بنداو آ پٹرول نا نہاد آتے ودفنگ نا وڑ و ڈول ءِ چٹفنگے۔ حافظ نعیم الرحمن پارے کہ سود انا کچ ءِ کم کننگ نا قول آ حکومت عملدرآمد کے، سرکاری خڑچ آتے کم کننگ نا جاگہ غا الس آ باریم شاغنگ انگ ءِ۔ سرکاری بالی جہاز نا کاریم اٹ اتنگ نا پورو ریکارڈ قوم انا مون آ اتنگے و دا باندات نا پورو جاست پاست کننگےِ۔ او خواست کرے کہ وزیر و سرکاری افسر آتا گاڈیک 1300 سی سی اسکان کننگر۔ حافظ نعیم الرحمن مستی پارے کہ شریف خاہوت اقتدار اٹ بریک تو کشارگرآک بھس مریرہ۔