امن کن پاکستان نا کوشست آتا مخ تفی آ ملائیشیا نا کڑد ستاکڑزک،اسپیکر قومی اسمبلی

کیپ ٹاؤن، قومی اسمبلی نا اسپیکر سردار ایاز صادق ملائیشیا نا ہاؤس آف رپریزنٹیٹوز نا اسپیکر ڈاکٹر جوہری بن عبدل تون اوڑدہی کرے، ہراٹی ہڑتوم آ ملک آتا پارلیمانی تعلقداری تے پین سوگو کننگ آ امناکننگا۔ قومی اسمبلی سیکرٹریٹ نا رداٹ سردار ایاز صادق دا وخت آ پارے کہ پارلیمانی فرینڈشپ گروپس ہڑتوم آ ملک آتا نیام اٹ تعلقداری تے پین سوگو کننگ اٹ اہم کڑد ادا کننگ کیک۔ او پارے کہ نیامی دے ٹک اٹی امن کن پاکستان نا کوشست آتا مخ تفی آ ملائیشیا نا کڑد ستاکڑزک، پاکستان علاقائی امن و سوگوی کن سفارتی کوشست آتے برجا تخنگ کن سنبرینگوک ءِ۔ اسپیکر پارے کہ پہلگام واقعہ غان پد ودی مروک بے چیٹی نا وخت آ پاکستان امن ءِ اولیت تس، بھارت سندھ طاس معاہدہ ءِ تینا خودآن معطل کرسا جہانی کانود آتا خلاف ورزی ءِ کرے۔ او پارے کہ پاکستان ءِ اوغان ڈغار آن دہشت گردی مون تروک ءِ، علاقائی جھیڑہ غاتا پرامن ایسر المی ءِ۔ او پارے کہ پاکستان ڈیہہ اٹی امن و سوگوی نا مون آ دننگ کن سنبرینگوک ءِ، مکہ مکرمہ جوائنٹ ڈیفنس معاہدہ غا گچین عملدرآمد مسلم ملک آتا سیوت اٹ کمکار مریک۔ اسپیکر سردار ایاز صادق ملائیشین ہم منصب ءِ پاکستان نا دورہ ءِ کننگ نا سلہ ہم خلک۔