او آئی سی نا مقدس ہند آتیا جلہو نا مذمت، سعودیہ تون یکجہتی نا پڑو

جدہ، اسلامی کمکار تنظیم (او آئی سی) مکہ و مدینہ ریجن آ حوثی تا خارتس جلہو و سعودی عرب نا برخلاف بیدادی نا سخت انگا لوز آتے ٹی مذمت ءِ کرینے۔ او آئی سی نا جنرل سیکرٹریٹ نا کنڈ آن سوشل میڈیا پلیٹ فارم ایکس آ جاری مروک بیان اٹی پاننگانے کہ دا جلہو تیان بے گناہ شاری تے ٹی بھیم تالان مس۔ مقدس ہند و مسیت آتا شرف لتاڑ مس و مچ آ دنیا نا مسلمان تا جوزہ غاک زہمی مسر۔ بیان اٹی پاننگا کہ مقدس ہند، مسیت و شاری ہند آتا برخلاف حوثی ملیشیا نا کارروائیک ہندن ءُ دہشت گردی ءُ ہرافک اسلامی قدر، جہانی اصول و کانود آن چَپ ءُ۔ اسلامی کمکار تنظیم مستی پارے کہ مقدس ہند آتا شرف انا خلاف ورزی اسہ امنا کپروک و سگنگ مفروک گام اسے، ہرانا زموار آتا حوصلہ شکنی کننگ و دن انگا گام گیج آتا کسر ءِ توننگ المی ءِ۔ تنظیم سعودی عرب تون پورو یکجہتی نا درشانی ءِ کرسا پارے کہ ریاض نا کنڈ آن تینا سلامتی، وتواجہی و مقدس ہند آتا رکھ اکن کننگوک گام گیج آتا مخ تفی کننگک۔