مکہ مکرمہ غا حوثی تا جلہو مچ آ اسلامی دنیا غا تکنگک، مولانا فضل الرحمان

اسلام آباد، جمعیت علماء اسلام نا سروک مولانا فضل الرحمان پارینے کہ مکہ مکرمہ غا حوثی تا جلہو مچ آ عالمِ اسلام آ جلہو تکنگک۔ مکہ مکرمہ بیرہ اسہ شار اس اف بلکہ ارب آ مسلمان تا عقیدت آتا بنجاءِ۔ خدا کَپ اگہ دا جلہو مس تو بدبخت جلہو کروک آک عالمِ اسلام نا غیض و غضب آن بچپسہ۔ اسہ بیان اسے ٹی امیر جے یو آئی پارے کہ امتِ مسلمہ ترندی اٹ دا جلہو نا پورو ورندی ءِ ایتک و سعودی عرب نا رکھ ءِ پک کیک۔ او پارے کہ مسلمان ملک آک خاص وڑ اٹ پاکستان دا نازک و سختی نا ساہت اٹ سعودی عرب و حرمِ مکی نا رکھ اٹی اولیکو چِر انا کڑد ءِ ادا کے۔ او پارے کہ پاکستان حرمین شریفین نا رکھ انا بابت پیدوار پالیسی نا دمدستی پڑو ءِ کے۔ او پارے کہ امتِ مسلمہ ءِ ہڑدے مون تروک چیلنج آتیان سوگو و بھرمی اسلامی بلاک نا جوڑ کننگ نا گرج مستین آن زیات محسوس کننگ انگ ءِ۔ او پارے کہ جمعیت علماء اسلام نا لکھ آ کارندہ غاک مملکت سعودیہ غا جلہو نا ڈکھ و درد اٹی شریدار ءُ۔ او پارے کہ سعودی عرب آ جلہو امریکہ و دیکی دنیا نا دو رغہ ئی اسہ وار ولدا بے پردہ کرے۔