پاکستان حرمین شریفین نا رکھ اکن سعودی عرب تون اوار سلوک ءِ، اسحاق ڈار

اسلام آباد، پاکستان نا نائب وزیر اعظم و وزیر خارجہ مکہ ریجن نا کنڈ آ ڈرون جلہو نا کوشست نا سختی اٹ مذمت ءِ کرسا پارینے کہ پاکستان حرمین شریفین نا رکھ اکن سعودی عرب تون اوار سلوک ءِ۔ چارشنبے نادے آ ایکس آ تینا اسہ بیان اسے ٹی نائب وزیراعظم و وزیر خارجہ سینیٹر اسحاق ڈار پارے کہ پاکستان دا گام انا سختی اٹ مذمت ءِ کیک، دا گام سعودی عرب نا علاقائی وتواجہی و سالمیت نا خلاف ورزی ءِ و وخت اس کہ داڑان مچ آ دنیا نا مسلمان تا مذہبی جوزہ غاک زہمی مسنو۔ دا گام علاقائی امن و سلامتی کن ہم گڑتی اسےِ۔ او پارے کہ پاکستان حرمین شریفین نا تقدس و سلامتی و زیارت کن بروک بندغ، شاری و ہنکینی تا رکھ اکن سعودی عرب نا الس و اونا سرکڑدہ غاتتون اوار سلوک ءِ۔