چین لاء انفورسمنٹ سینٹر نا جوڑ کننگ اٹ کمک کیک، محسن نقوی

اسلام آباد، بنجائی وزیر داخلہ محسن نقوی تون چین نا نائب وزیر پبلک سیکورٹی گاو چی چارشنبے نادے اوڑدہی کرے، ہراٹی پاک چین ہڑتوم آ کنڈآتا تعلقداری، دہشت گردی تور و منشیات نا بابت اسیجائی گام گیج آتیاسرجمی اٹ گپ وتران کننگا۔ اوڑدہی ٹی پولیس ٹریننگ ایکسچینج پروگرام و فورس آتے پوسکنوڑ ٹیکنالوجی و ازباب تننگ نا بابت تین پہ تینی کمک ءِ پین ودفنگ آ امنا کننگا۔ دا وخت آ دا ہیت آامنائی سلاہ ہم مس کہ چین پاکستان اٹ پوسکنوڑ لاء انفورسمنٹ سینٹر جوڑ کننگ اٹ پورو تکنیکی و لاجسٹک کمک فراوان کیک۔ بنجائی وزیر داخلہ محسن نقوی پارے کہ سلاہ ئی لاء انفورسمنٹ سینٹر پاک چین سنگتی نا اسہ پین روشنا چیدہ اس جوڑ مریک۔ او پیدوار کرے کہ اینو نا دور انا سیکورٹی چیلنج آتتون گچین وڑاٹ مون تننگ کن چینی آرٹیفیشل انٹیلی جنس بیسڈ ٹیکنالوجی و پوسکن آ ازباب آن بھلو کمک اس ملنگ کیک۔ او دا ارادگی نا درشانی ءِ کرے کہ پاکستان چین اتون داخلی سلامتی نا بابت کل بشخ آتیٹی کمک ءِ پین ودفنگ نا خواہندار ءِ۔ چینی نائب وزیر داخلہ گاو چی دہشت گردی نا برخلاف جنگ اٹ پاکستان نا سوگو ارادگی و دروری قربانی تا ستاءِ کرسا سیکورٹی نا بشخ اٹی اسلام آباد تون پورو کمکاری ءِ برجا تخنگ نا باوری کرفے۔