حوثی تا داسہ نا کارروائیک علاقائی امن و سلامتی کن گڑتی نا سوب ءُ،وزیراعظم محمد شہباز شریف

اسلام آباد، وزیراعظم محمد شہباز شریف سعودی عرب نا ولی عہد و وزیراعظم شہزادہ محمد بن سلمان بن عبدالعزیز آل سعود تون ٹیلفون آ حوال کرے۔ ہڑتوم آ سرکڑدہ غاتا نیام اٹی گپ و تران ایلمی چاگڑد اٹی مس۔ وزیراعظم شہباز شریف سعودی عرب آ حوثی تا داسہ نا جلہو، خاص وڑ اٹ شاری و زرگزرانی بنداوی پنجر ءِ شست کننگ نا سخت انگا لوز آتے ٹی مذمت ءِ کرے۔ او سعودی سرکڑدہ و ایلم سعودی الس تون پورو یکجہتی نا درشانی ءِ کرسا پارے کہ حوثی تا ساڑی کارروائیک علاقائی امن و سلامتی کن گڑتی ناسوب ءُ و جہانی زرگزران و توانائی نا فراوانی ٹی پین اڑاند نا سوب جوڑ مننگ کیرہ۔ وزیراعظم پارے کہ او فیلڈ مارشل سید عاصم منیر و نائب وزیراعظم و وزیر خارجہ محمد اسحاق ڈار تون اوار چک و تاڑ اٹی کمتی و ڈیہہ اٹی امن نا پک کننگ کن تینا کوشست آتے برجا تخنہ۔ شہباز شریف ساڑی تنکی نا وخت آ ہُر مننگ وپامداری آ سعودی ولی عہد ءِ خراجِ تحسین پیش کرے۔ او خادم حرمین شریفین شاہ سلمان بن عبدالعزیز آل سعود کن تینا نیک استخواہی تا درشانی ءِ ہم کرے۔ سعودی ولی عہد شہزادہ محمد بن سلمان سعودی عرب کن پاکستان نا پدریسہ و سوگو مخ تفی و ڈیہہ اٹی امن و سوگوی کن پاکستان نا کوشست آتا ستاءِ کرے۔ ہڑتوم آ سرکڑدہ غاک خڑک رابطہ برجا تخنگ آ امنا کریر و زوت اوڑدہی نا استخواہی نا درشانی ءِ کریر۔ دا وخت آ نیامی دے ٹک اٹ ساڑی چک و تاڑ و دانا سوب آن جہانی منڈی ٹی ودوک آ تیل انا نہاد آتا الس آ باریم نا ودنگ نا دمدستی نوٹس ہلسا وزیراعظم نا کنڈ آن اسہ خصوصی ریلیف اسکیم اس جاری کننگانے و وزیراعظم شہباز شریف پارینے کہ تیل انا نہاد آتیٹی ودکی آن تموک آ باریم نا حکومت ءِ سما ءِ‘ الس ءِ تنیا الیپنہ، خصوصی ریلیف اسکیم نا رِد اٹ موٹر سائیکل، رکشہ، چنگچی و 800 سی سی اسکان گاڈی کاریم اٹ اتوک آتیٹ پٹرول آ فی لیٹر 100 روپئی نا ریلیف تننگک۔ وزیراعظم پارے کہ تیل انا نہاد آتیٹی ودکی نا سوب آن الس آ مروک باریم نا حکومت ءِ سماءِ‘ سختی نا دا ساہت اٹی نن الس ءِ تنیا الیپنہ۔ موٹر سائیکل، رکشہ، چنگچی و چنکا گاڈی کاریم اٹ اتوک آتیا تیل انا نہاد آتیٹی ودکی آن تموک آ باریم ءِ کم کننگ کن خصوصی اسکیم نا بنا کننگ انگ ءِ۔ وزیراعظم پارے کہ خصوصی ریلیف اسکیم نا رِد اٹ موٹر سائیکل، رکشہ، چنگچی و 800 سی سی اسکان گاڈی کاریم اٹ اتوک آتیکن پٹرول آ فی لیٹر 100 روپئی نا ریلیف تننگک۔ ہندا وڑ چنکا گاڈی دُنکہ 800 سی سی اسکان نا گاڈی تا خواجہ غاتے تُو انا 30 لیٹر پٹرول 100 روپئی فی لیٹر نا ریلیف فراوان کننگک۔ وزیراعظم پارے کہ اسلام آباد نا دنگ اٹی دانا عملدرآمد بروک آ دوشنبے و سے شنبے نا نیامی نن آن کننگک وخت اس کہ مچ آ پاکستان اٹی کشمیر و گلگت بلتستان تون اوار دانا عملدرآمد چارشنبے و پنچ شنبے نا نیامی نن آن مریک۔