کوئٹہ، کانود آن چَپ ماڑی تفنگ نا برخلاف کریک ڈاؤن،11ماڑی سیل، 7 بندغ دزگیر

کوئٹہ، وزیراعلیٰ بلوچستان میر سرفراز احمد بگٹی نا بلڈنگ کنٹرول کانود آتا بھرمی عملدرآمد، رکھوک و کانودی تفوئی کاریم تے پک کننگ و شاری تا جان و مال انا رکھ نا وژن نا رِد اٹ کوئٹہ ٹی کانود آن چَپ تفوئی کاریم تا برخلاف کارروائی تیٹی ترندی بسنے۔ ایڈمنسٹریٹر میٹروپولیٹن کارپوریشن کوئٹہ بشیر احمد بڑیچ نا پارت آ میٹروپولیٹن کارپوریشن نا تعلقدار بشخ آک شار انا جتا جتا علاقہ غاتیٹی بلڈنگ کانود نا خلاف ورزی کروک ماڑی تا برخلاف کارروائی نا ریسہ ءِ برجا تخانو۔ حوال نارد اٹ چیف آرکیٹیکٹ میٹروپولیٹن کارپوریشن کوئٹہ اشفاق بادینی و میٹروپولیٹن مجسٹریٹ (بلڈنگز) نوید بلوچ نا کماشی ٹی نیو سبزل روڈ (سی پیک روڈ) و اے ون سٹی ٹی کانود آن چَپ تفوئی کاریم تا برخلاف کارروائی کننگا۔ کارروائی نا وخت آ میٹروپولیٹن کارپوریشن کوئٹہ نا منظوری و این او سی آن چَپ تفنگوک یا بلڈنگ کنٹرول کانود آتا خلاف ورزی کروک 11 ماڑی، پلازہ و دکان تے سیل کننگا، کارروائی نا وخت آ کمامدار آک کانود آن چَپ تفوئی کاریم تازموار 7 بندغ ءِ دزگیر ہم کریر،خت اس کہ قاعدہ و ضابطہ نا خلاف ورزی کرسا تفنگوک منہ بشخ آتے جاگہ غا بٹنگا۔ تعلقدار کمامدار آک پارینو کہ کارروائی نا مسخت شار اٹی کانود آن چَپ و بے رکھ تفوئی کاریم تے توننگ و تفوئی سرجز آتے پک کروک کانود و ضابطہ نا دنگ اٹی اتنگ ءِ‘ کارروائی نا وخت آ زرغون و چلتن زون نا مانیٹرنگ سپروائزر آک ہم ساڑی ئسر و تفوئی سرجز آتا جاچ ءِ ہلکر۔ تعلقدار ٹیمک چندی ماڑی تا تفوئی ریکارڈ، نقشہ غاتا منظوری و این او سی تون اوار ایلو کانودی کاغد آتا جاست پاست ءِ کریر و خلاف ورزی پک مننگ آ کارروائی کننگا۔ میٹروپولیٹن کارپوریشن کمامدار آتا رِد اٹ نیو سبزل روڈ (سی پیک روڈ) ءِ کمشنر کوئٹہ ڈویژن نا کنڈ آن نو کنسٹرکشن زون گوندنگانے، ہراڑان پد پندار علاقہ ٹی ہر وڑ انا پوسکن تفوئی کاریم نا موکل اف۔ کمامدار آک پیدوار کریر کہ نو کنسٹرکشن زون اٹی تفوئی سرجز آتا موکل مفننگ آن پد ہم اگہ کس اس یا ادارہ اس تفوئی کاریم کیک تو اونا برخلاف کانود نا رِد اٹ کارروائی کننگک۔ میٹروپولیٹن کارپوریشن کوئٹہ نا کنڈ آن شاری، بلڈرز، تفوئی کمپنی و ایلو تعلقدار بندغ آتے پارت کننگانے کہ او ماڑی یا پلازہ نا تفنگ ءِ بنا کننگ آن مست کل المی کانودی خواست آتے پورو کیر۔ تفوئی نقشہ نا منظوری، این او سی و ایلو تعلقدار موکل تا دوئی کننگ آن پد تفوئی کاریم بنا کننگے تاکہ پد اٹی کانودی کارروائی یا مالی نسخان آن بچنگ مرے۔ کمامدار آک شاری تیان ہم خواست کرینو کہ اگہ اوفتے بلڈنگ کانود، تفوئی موکل یا نقشہ نا منظوری نا بابت ہچ ءُ وڑ اسے نا راہشونی درکار مرے تو او میٹروپولیٹن کارپوریشن کوئٹہ نا تعلقدار دفتر آ کار۔ کارپوریشن پارینے کہ کانودی خواست آتے پورو کروک شاری و بلڈر آتے ہر وڑانا آسراتی فراوان کننگک۔