سعودیہ تون جنگ کپنہ، امریکہ ٹی وس ارے تو ایرانی فوج اتون مون ایتے،مسعود پزشکیان

تہران، ایرانی صدر مسعود پزشکیان پارینے کہ ایرانی الس ہچ گہس سلہہ بٹپک و ایران ءِ زور انا زی آ منفنگ آبیوس کننگ مفک۔ سوشل میڈیا پلیٹ فارم ایکس آ جاری بیان اٹی مسعود پزشکیان امریکہ نا کنڈ آن شاری ماڑی، کنشت و بندغ آتا روزگار ءِ شست کننگ آ سوج ہرفسا پارے کہ اگہ امریکہ ٹی وس ارے تو ایرانی فوج اتون مون ایتے، شاری بنداوی پنجر و کنشت ءِ انتئے شست کننگ انگ اٹی ءِ؟ ایرانی صدر بنداوی گرج آتسکان رسینگ گیگ ءِ کچ اٹ کننگ آ ہم امریکہ غا سخت تنقید کرسا پارے کہ اگہ امریکی انسانیت آ باور کیک تو الس ءِ دیر، کنوئی گڑا و دارو تسکان رسینگ آن انتئے محروم کننگ انگ ءِ۔ ایران نا صدر مسعود پزشکیان پارینے کہ ایران سعودی عرب تون جنگ کپک‘ حوثی تا تینا ویل آک ءُ، ڈیہہ انا کل ملک آتے اسہ میز اسے آ تولسا ڈیہہ اٹی امن و سلامتی کن کاریم کروئی تمک۔ مسقط اٹی آبنائے ہرمز آ ایران و عمان نا نیام اٹی گمانی معاہدہ نا بابت ایرانی صدر پارے کہ دیوان اٹی ہمو کل ملک آک بشخ ہلیرہ ہرافتا ڈغار آن ایران آ جلہو کننگاسس۔ او پارینے کہ ایران تینا جہانی حق آتے خواپک، جنگ خواپک داسہ ہم امن ءِ اولیت ایتک، امریکہ، اسرائیل و یورپی ملک آک خوارہ کہ علاقہ ٹی ہچ ءُ ملک اس آجو مف۔ ایلو کنڈ آ ایرانی صدر مسعود پزشکیان انڈیا ٹوڈے تون ہیت کرسا پارینے کہ خدا نا شکر ءِ کہ ننا رہبرِ اعلیٰ زندہ و مست آنبار نظام اٹ تینا کڑد ءِ ادا کننگ اٹی ءِ۔ دشمن اوفتا ہند ءِ پٹنگ اٹی بے سہب مسنے، ہندا سوب آن جتا جتا وڑ انا گمان آک کننگ انگ ءُ۔ او مستی پارے کہ دشمن ننا ساڑی رہبرِ اعلیٰ تون ہمون کننگ نا کوشست کننگ اٹی ءِ ہرا او مسکوہی رہبرِ اعلیٰ تون کروسس۔ مسعود پزشکیان امریکہ و اسرائیل آ تنقید کرسا پارے کہ ‘امریکہ و اسرائیل اسہ بندغ اسے نا مچ آ خاہوت نا خون ءِ کیرہ، اسہ ماڑی اسے بھس کیرہ و اوکان پد دا دعویٰ کیرہ کہ او بندغ دہشت گرد اس ئس، دا دا دنیا ٹی ڈوہ کننگ نا اسہ پوسکن ءُ وڑ اس جوڑ مسنے۔