روس انا ہکل،اوغانستان اٹی داعش خراسان داسہ ہم بھلو سیکورٹی گڑتی اسے

نیویارک، روس ہکل تسنے کہ اوغانستان اٹی داعش خراسان داسہ ہم اسہ بھلو سیکورٹی گڑتی اسے و دہشت گرد ٹولی تا کنڈ آن پوسکنوڑ ٹیکنالوجی نا کاریم اٹ اتنگ اٹی ودکی نا سوب آن جہانی کہول آ دا گڑتی تون مون تننگ کن اواری اٹ کوشست آتا گرج ءِ۔ اقوامِ متحدہ نا سلامتی کونسل نا دیوان آن تران کرسا اقوامِ متحدہ ٹی روس انا آخبتی نمائندہ واسیلی نیبنزیا پارے کہ اوغانستان و افریقہ نا منہ علاقہ غاتیٹی دہشت گردی نا گڑتی داسکان ساڑی ارے۔ دا دیوان 11 ستمبر 2001ء نا دہشت گرد جلہو آتا 25 می سال دے انا بابت اڈ تننگاسس۔ روسی مندوب پارے کہ جتا جتا ڈیہہ تا نیام اٹی پیشن نا دہشت گرد جنگوڑو آتا ہن و بر و اسہ علاقہ ٹی دوئی مروک جنگی آزموندہ غاتے ایلو علاقہ غاتسکان گدریفنگ نا چیلنج داسکان ایسر مننگ کتنے۔ واسیلی نیبنزیا دہشت گرد ٹولی تا وڑ و ڈَول اٹی بروک آ بدلی تیا ہم چکار کرفے، دہشت گرد تنظیم آک بھرتی، پروپیگنڈہ، مالی کمک و جلہو آتا ڈٹ بندی و حوال کننگ کن پوسکنوڑ ٹیکنالوجی، ڈیجیٹل مالیاتی وڑ‘ ڈرون، اے آئی و پوسکنوڑ مواصلاتی نیٹ ورک ءِ کاریم اٹ اتنگ اٹی ءُ۔ او دا گڑتی تے سیم تیان ایڑتر گوندسا دہشت گردی نا برخلاف جہانی کہول آ اسیجائی کمکاری نا گرج آ زور شاغا۔ روسی مندوب پارے کہ داعش خراسان تدوک آ سال آتیٹی اوغانستان اٹی کیہی بھلو جلہو کرینے و اوغانستان آن پیشن ہم کارروائی کننگ نا لائخی نشان تسنے۔