اسلام آباد نا جند انا اسمبلی یا صوبائی حکومت جوڑ مننگ جوان ءُ گام اسے،وزیر دفاع خواجہ آصف

اسلام آباد، وزیر دفاع خواجہ آصف ہم پوسکن آ انتظامی یونٹ آتا مخ تفی ءِ کرسا پارینے کہ اسلام آباد نا جند انا اسمبلی یا صوبائی حکومت جوڑ مننگ اسہ جوان ءُ گام اس مریک، و اگہ اولیکو ریسہ اٹی بنجائی دارالحکومت اٹی دا ماڈل آ عملدرآمد مریک تو ملک انا ایلو بشخ آتیٹی ہم پوسکن آ انتظامی یونٹ آتا جوڑ مننگ نا کسر آوار مننگ کیک۔ واکداری تے شیفکو کہول اسکان گدریفنگ و السی ویل آتا ایسری الس نا حق ءِ۔ پارلیمنٹ ہاؤس اٹی میڈیا تون ہیت وگپ کرسا خواجہ آصف پارے کہ اسلام آباد اٹی تینا اسمبلی یا صوبائی حکومت نا جوڑ مننگ اسہ مثبت گام اسے۔ دنیا نا کیہی دارالحکومت آتیٹی دا وڑ انا انتظام ساڑی ءِ، وخت اس کہ نئی دہلی ٹی ہم جتا حکومت کاریم کننگ اٹی ءِ۔ وزیر دفاع پارے کہ اگہ اسلام آباد اٹی دا نظام آ عملدرآمد کننگا تو آخبت اٹی ملک انا ایلو صوبہ غاتیٹی ہم پوسکن آ انتظامی یونٹ جوڑ کننگ ءِ عملی دروشم تننگ آسان مریک۔ خواجہ آصف پارے کہ دا باندات آ ہچ خلیس نا گرج اف‘ اوغانستان اٹی ہم 34 آن 35 صوبہ ءُ۔ او پارے کہ پوسکن آ انتظامی یونٹ آتا جوڑ کننگ نا رد اٹ صوبہ غاتا سخت رویہ جوان اف، انتئے کہ دا ہچ ءُ صوبہ اسے نا برخلاف گام اس اف بلکہ بنجا ءِ پین سوگو کننگ نا وسیلہ جوڑ مننگ کیک۔ او پارے کہ پوسکن آ صوبہ غاتا جاگہ غا پوسکن آ انتظامی یونٹ نا اصطلاح کاریم اٹ اتنگے تو پین جوان مریک۔ او پارے کہ انتظامی پنجر ءِ الس نا خڑک اتنگ آن واکداری تا شیفکو کہول اسکان گدریفنگ مننگ کیک و الس نا ویل آک پین جوان وڑ اٹ ایسر مریرہ۔ وزیر دفاع پیدوار کرے کہ اودے مسلم لیگ (ن) یا وزیراعظم نا کنڈ آن پوسکن آ صوبہ غاتا بابت ہچ ءُ پیش رفت اسے نا سما اف۔ سندھ حکومت نا کنڈ آن دا باندات آ جتا موقف ہرفنگ نا رِد اٹ او پارے کہ دا اوفتا حق ءِ ولے ہراتم اگہ اسہ باندات اسے آ اسیجائی فیصلہ اس مریک تو کل ءِ اودے امنا کروئی تمک۔ خواجہ آصف زور شاغا کہ واکداری تے شیفکو کہول اسکان گدریفنگ و الس نا ویل آتے اوفتا درگہ غا ایسر کننگ ریاستی نظام نا بنیادی گرج ءِ، و انتظامی اصلاحات نا مسخت الس ءِ گچین حکمرانی و جوان آسراتی تا فراوانی بایدے مرے۔