پاک فضائیہ نا جانباز آک وطن نا رکھ اکن تاریخ اس پک کریر،وزیراعلیٰ بلوچستان

کوئٹہ، وزیراعلیٰ بلوچستان میر سرفراز بگٹی یومِ فضائیہ نا وخت آ پاک فضائیہ نا شاہین، شہید و غازی تے سلام پیش کرسا پارینے کہ وطنِ عزیز نا فضائی دنگ انا دفاع اٹ پاک فضائیہ نا خذمت، قربانی و کسبی لائخی قومی تاریخ نا است آن دپروک بشخ اسے ءُ۔ تینا خصوصی کلہو اٹ وزیراعلیٰ پارے کہ راشد منہاس شہید تون اوار پاک فضائیہ نا جانباز آک وطن نا دفاع کن جیرت، شجاعت و قربانی نا بھلو داستان اس نوشتہ کریر۔ دا بہادر گلزادہ غاتا قربانی بروک آ چین تیکن عزم، حوصلہ و حب الوطنی نا روشنا استعارہ ءِ۔ وزیراعلیٰ میر سرفراز بگٹی پارے کہ تدوک آ سال مئی ٹی معرکہ حق انا وخت آ پاک فضائیہ تینا بے کچ کسبی مہارت، پوسکن آجنگی لائخی و دروری جیرت نا درشانی ءِ کرسا ملکی فضائی دنگ انا دفاع نا شانی روایت ءِ پین سوگو کرے۔ پاک فضائیہ نا شاہین تا دا گچین و ستاکڑزوک کارکڑد مچ آ قوم انا کاٹم ءِ گمراٹ بڑز کر ے و اسہ وار ولدا پک کریرکہ پاکستان نا فضائی دنگ انا دفاع سوگو و لائخ آ دُوتیٹی ءِ۔ او پارے کہ یومِ فضائیہ بیرہ اسہ قومی دے اس اف بلکن قومی سیوب، بدل مفروک عزم و وطن تون وفاداری نا جوزہ نا پوسکنی نا وارخواہی ہم ارے۔ قوم تینا شاہین تا کسبی مہارت، جیرت و فرض شناسی ءِ قدر انا نظر اٹ ہرک و پاک فضائیہ نا خذمت آتیا گمرکیک۔ وزیراعلیٰ پارے کہ ملکی دفاع کن تینا جان تے ندر کروک شہید آک قوم انا حقی ہیروکءُ۔ اوفتا قربانی تے اسُل است آن دننگ مفک و مچ آ قوم شہید آتا خاہوت آتتون اوار سلوک ءِ۔ وزیراعلیٰ بلوچستان دعا کرے کہ اللہ تعالیٰ پاک فضائیہ نا کل شہید آتا درجہ غاتے بڑز کے، اوفتے جنت الفردوس اٹ بڑز کوجاگہ اس عطا کے و اوفتا پدخاہوت آتے صبر و استقامت عطا کے۔ او پاک فضائیہ نا غازی و ساڑی شاہین تا سلامتی، سرسہبی و پین بڑزی کن ہم نیک استخواہی تا درشانی ءِ کرے۔