حکومت بلوچستان جانجوڑی بشخ اٹی جوانی اتنگ ءِ اولیت آتیٹی تخانے،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی تون پریذیڈنٹ انڈس ہاسپیٹل اینڈ ہیلتھ نیٹ ورک ڈاکٹر عبدالباری خان و ممبر پلاننگ کمیشن شبانہ حیدر نا کماشی ٹی ڈل اس اوڑدہی کرے۔ اوڑدہی ٹی انڈس ہسپتال اینڈ ہیلتھ نیٹ ورک نا بیکٹر، ڈیرہ بگٹی ٹی طبی آسراتی تا فراوانی، جانجوڑی نا بشخ اٹی شریداری نا ڈٹ و بلوچستان نا الس کن آب اٹو طبی آسراتی تا فراوانی نا باندات آتیا جم سجفنگا۔ داوخت آ صوبائی وزیر جانجوڑی بخت محمد کاکڑ و سیکرٹری جانجوڑی مجیب الرحمن پانیزئی ہم ساڑی ئس۔ اوڑدہی نا وخت آ وزیراعلیٰ میر سرفراز بگٹی پارے کہ حکومتِ بلوچستان جانجوڑی بشخ اٹ اصلاحات و آب اٹو طبی آسراتی تا فراوانی ءِ تینا اولیت آتیٹی کل آن مون اٹ تخانے۔ صوبہ نا غریب و حقدار الس کن جوان وآب اٹو درمان نا آسراتی فراوان کننگ حکومت نا بنداوی زمواری ءِ‘ ہراڑکن دوئی کل وسیلہ غاتے کاریم اٹ اتنگ انگ ءِ۔ وزیراعلیٰ پارے کہ جانجوڑی بشخ اٹ جوانی کن بیرہ طبی ہند پوسکنوڑ ازباب آک گنج اس افس، بلکہ ہیلکار و لائخ ہیومن ریسورس ہم بنداوی وڑ اٹ اہم ءِ۔ حکومتِ بلوچستان میرٹ نا شون تننگ و ادارہ غاتیٹی لائخ آتا بندغ آتا تعیناتی نا اصول آ کاریم کننگ اٹی ءِ تاکہسرکاری نظام اٹی کسبی لائخی و کارکڑد ءِ پک کننگ مرے۔ میر سرفراز بگٹی پیدوار کرے کہ وزیراعلیٰ سیکریٹریٹ آن ہچ ءُ تقرری یا تعیناتی سے کن سفارش کننگپک۔ او پارے کہ کل باندات آک میرٹ و شفافیت نا بنداو آ مونی کارہ‘ حکومت ہچ ءُ وڑ انا سیاسی زورشاغنگ ءِ میرٹ نا کسر اٹی اڑاند مننگ کن الیپک۔ او پارے کہ “نن میرٹ آ کاریم کینہ، سیاسی باریم ہرفنگ کن تیار اُن ولے میرٹ آ ہچ ءُ سمجھوتہ اس کپنہ۔” وزیراعلیٰ پارے کہ حکومتِ بلوچستان جانجوڑی بشخ اٹ پرائیویٹ و غیر سرکاری ادارہ غاتا آزموندہ و چاہنداری تے کاریم اٹ اتنگ کن تیار ءِ۔ انڈس ہسپتال اینڈ ہیلتھ نیٹ ورک کون آ ادارہ غاتتون شریداری آن صوبہ نا مر انگا علاقہ غاتیٹی جانجوڑی نا آسراتی تے گچین کننگ و الس ءِ اوفتا درگہ غا آب اٹو طبی خذمت فراوان کننگ اٹ کمک رسینگک۔ اوڑدہی ٹی بیکٹر، ڈیرہ بگٹی ٹی انڈس ہاسپٹل اینڈ ہیلتھ نیٹ ورک نا ڈٹ‘ طبی آسراتی، ہیومن ریسورس نا ہیلکاری‘ جانجوڑی نظام نا بحالی و آخبت نا اسیجائی ڈٹ آتا بابت سلاہ تا جاچ ءِ ہلنگا۔ وزیراعلیٰ دا عزم انا درشانی کرے کہ بلوچستان اٹی جانجوڑی نا نظام ءِ پوسکن آ خواست آتتون ہمگرنچ کرسا الس کن شرفی‘ وخت آ و آب اٹو طبی آسراتی فراوانی کن گام گیج آک برجا سلرہ۔