پاکستان، سعودی عرب و ترکیہ نا تنکی تا پر امن ایسری کن علاقائی امن نا ارادہ نا دوارگی،ترجمان دفتر خارجہ طاہر حسین اندرابی

اسلام آباد، پاکستان، سعودی عرب و ترکیہ تنکی تا پرامن ایسری، سگ و چک وتاڑ اٹ کمتی نا کمک اٹ علاقائی امن و سوگوی نا عزم انا دوارگی کرسا مکہ معاہدہ نا رِداٹ کمکاری ءِ پین ادارہ ئی دروشم تننگ، جم دفاع و اسیجائی سلامتی ءِ سوگو کننگ آ امنا کرینو، ہر مسٹ آ ملک عسکری و دفاعی صنعت، اسیجائی ٹیکنالوجی نا تیاری و سلہ بند فوج انا کاریمی واکداری کچ ءِ ودفنگ کن تینا کمکاری ءِ پین ودفرہ۔ فیلڈ مارشل سید عاصم منیر نا دورہِ ایران پاکستان نا امن نا کوشست آتا بشخ اس ئس، دورہ چَک و تاڑ نا چٹفنگ کن پاکستان نا سنجیدہ کوشست آتا ڈیک ءِ‘ جہانی ثالثی عدالت سندھ طاس معاہدہ نا بابت پاکستان نا موقف ءِ امنا کرے‘ بروک آ سال پاکستان شنگھائی کمکار تنظیم نا سروکی دیوان نا مہمانداری ءِ کیک۔ پاکستان نا ایس سی او چیئرمین شپ نا سرحال “وژن ءِ عمل اٹی بدلیفنگ‘ رابطہ کاری، پوسکنوڑ و اسیجائی شونہالی‘ ءِ۔ دفترِ خارجہ نا ترجمان طاہر حسین اندرابی چار شنبے نا دے ہفتہ وار پریس بریفنگ اٹی پارے کہ وزیراعظم شہباز شریف بشکیک اٹی ءِ ہراڑے او کرغزستان نا صدر صدیر جاپاروف تون اوڑدہی کرینے، پاکستان و کرغزستان نا نیام اٹی واپاری‘ زرگزران، زرکاری و انفراسٹرکچر تون اوار چندی بشخ آتے ٹی معاہدہ و مفاہمتی یادداشت آ دستخط کننگانے۔ وزیراعظم شہباز شریف و کرغز صدر صدیر جاپاروف اسیجائی پریس ٹیک آؤٹ اٹی ہڑتوم آ ملک آتا تعلقداری تا جتا جتا پہلو تیا گپ وتران کریر۔ ترجمان طاہر حسین اندرابی پارے کہ وزیراعظم شہباز شریف تدوک آ دے شنگھائی کمکار تنظیم نا ملکی سروک نا دیوان و ایس سی او پلس سمٹ اٹی بشخ ہلک، وزیراعظم و نائب وزیراعظم و وزیرِ خارجہ اسحاق ڈار ایس سی او سروک دیوان ناوخت آ جتا جتا ملک آتا ہم منصب و جہانی سرکڑدہ غاتتون اوڑدہی کریر، نائب وزیراعظم اسحاق ڈار ایس سی او نا سیکرٹری جنرل و اقوامِ متحدہ نا سیکرٹری جنرل تون ہم اوڑدہی کرے۔ ترجمان پارے کہ پاکستان شنگھائی کمکار تنظیم نا اسہ سال انا مُد انا چیئرمین شپ ءِ سنبھالانے۔ بروک آ سال پاکستان ایس سی او سروک دیوان نا مہمانداری ءِ کیک‘ پاکستان نا ایس سی او چیئرمین شپ نا سرحال ”وژن ءِ عمل اٹی بدل کننگ، رابطہ کاری، پوسکنوڑ و اسیجائی شونہالی“ ءِ۔ پاکستان ایس سی او نا باسک ملک آتتون اوار علاقائی امن و سوگوی‘ زرگزرانی کمکاری‘ حال حوال واسیجائی شونداری وشونہالی نا شون تننگ کن اواری اٹ کاریم کیک۔ ترجمان پارے کہ مکہ اسیجائی دفاعی معاہدہ نا رِداٹ جوڑ اسٹریٹجک سیاسی و دفاعی کمیٹی نا اولیکو بنائی دیوان 31 اگست آ استنبول اٹی اڈ ہلک، پاکستان، سعودی عرب و ترکیہ تنکی تا پرامن ایسری، سگ و چک وتاڑ اٹی کمتی نا کمک اٹ علاقائی امن و سوگوی نا عزم انا دوارگی کریر۔ ہر مسٹ آ ملک آک مکہ معاہدہ نا رِداٹ کمکاری ءِ پین ادارہ ئیی دروشم تننگ، جم دفاع و اسیجائی سلامتی ءِ سوگو کننگ آ امنا کریر۔ مکہ اسیجائی دفاعی معاہدہ نا سیکریٹریٹ سعودی عرب اٹی جوڑ کننگک۔ وخت اس کہ مکہ معاہدہ نا سیکرٹری جنرل نا تقرر بنائی وڑ اٹ مسہ سال اکن پاکستان آن کننگک۔ پاکستان، سعودی عرب و ترکیہ دفاعی صنعت، اسیجائی ٹیکنالوجی نا تیاری و سلہہ بند فوج انا واکداری کچ ءِ ودفنگ کن کمکاری ءِ پین ودفرہ۔