ایس سی او اسیجائی چیلنج آتتون مون تننگ نا جم ارادگی نا چیدہ ءِ،وزیراعظم محمد شہباز شریف

بشکیک، وزیراعظم محمد شہباز شریف شنگھائی کمکار تنظیم ءِ جہانی امن و سوگوی کن اہم ءُ پلیٹ فارم اس گوندسا پارینے کہ ایس سی او اسیجائی چیلنج آتتون مون تننگ نا اجتماعی عزم انا چیدہ ءِ، پاکستان ایس سی او نا فعال و زموار باسک اسے، نن جھیڑہ غاتا پرامن ایسر ی کن جہانی کانود نا رداٹ اقوام متحدہ و ایس سی او نا چارٹر نا راہشون پارت آتیا سختی اٹ عمل کننگ کن سنبرینگوک اُن، پاکستان علاقائی تنکی ٹی امن کن گچین ءُ کڑد اس ادا کرینے۔ مکہ اسیجائی دفاعی معاہدہ وتواجہی، علاقائی سالمیت، اجتماعی سلامتی و علاقائی امن نا بابت ننا اسیجائی عزم انا درشانی ءِ، پاکستان پُرامن، سوگو و شونہال اوغانستان نا خواہندار ءِ، ہراتم اسکان دہشت گرد آک اوغان ڈغار ءِ پاکستان و ایلو ہمسائے ملک آتیا جلہو، بے گناہ بندغ آتا کسفنگ کن کاریم اٹ کاریم اٹ اتسا کیرہ، ڈیہہ اٹی وخت اس ہم امن مفک۔ جہانی برادری فلسطینی الس تون اوار کل مظلوم قوم تے اوفتا وتواجہی نا حقِ انا بنداوی حق انا دوئی کننگ اٹ کمک کننگ نا تینا عزم ءِ بایدے پورو کے۔ دیر ننا بروک آ چین تا آخبت ءِ رکھ کیک، اودے وخت اس ہم سلہہ نا وڑاٹ کاریم اٹ اتنگپ، پاکستان راجی رکھ ءِ پین سوگو کننگ و ایس سی او ڈیہہ اٹی جم و مدامگی شونداری نا مون آ دننگ کن تینا کوشست آتے برجاتخک۔ او دا خیال آتا درشان ءِ سے شنبے نا دے شنگھائی کمکار تنظیم نا سروک کونسل نا دیوان آن تران کرسا کرے۔ وزیراعظم پارے کہ بشکیک نا زیبا انگا شار اٹ شنگھائی کمکار تنظیم نا راہشون تا تاریخی دیوان اٹ بشخ ہلنگ اوڑکن اعزاز نا سوب ءِ و پرخلوص مہمانی و کانفرنس کن شانی بست و بند آ صدر صادرژاپاروف و اونا ٹیم انا منت واری ءِ ہرفنہ، جمہوریہ کرغزستان ءِ ایس سی او چیئرمین شپ نا وخت انا سرسہبی اٹ پورو مننگ و ایس سی او ملک آتا نیام اٹ عملی کمکاری کن گچین کڑد آ مبارکباد ی پیش کینہ۔ وزیراعظم کرغزستان و ازبکستان نا سروک و الس ءِ اوفتا آجوئی نا دے آ ہم مبارکباد ی تس۔ او پارے کہ شنگھائی کمکار تنظیم جہانی امن و سوگوی کن اہم ءُ پلیٹ فارم اسے، شنگھائی اسپرٹ نا رداٹ پاکستان ءِ شنگھائی کمکار تنظیم نا باسک مننگ آ گمرءِ، پاکستان ایس سی او نا فعال و زموار باسک اسے، ایس سی او نا 25سال پورو مننگ اہم ءُ مزل نا نشان اسے، اسہ چُنکو نہال اسے آن بنا کروک ایس سی او اینو اسہ بھلو درخت اسے نا دروشم تینائی کرینے، ہرا ننے کل ءِ رکھ و سوگوی نا سیخافراوان کننگ ءِ۔ او پارے کہ اینو نا جہانی ڈیک ودوک آ جغرافیائی و سیاسی بے چیٹی، جہانی زرگزران نا بے چیٹی‘ موسمیاتی تنکی تیٹی ودکی و ٹیکنالوجی نا دروری بدلی تا گواچی ءِ، دا وڑانا ول ویچڑ چاگڑداٹ ایس سی او دا بھلا چیلنج آتتون اواری اٹ مون تننگ و تینا الس کن امن، رکھ و شونہالی ءِ پک کننگ کن ننا اجتماعی عزم انا نمائندگی ءِ کیک۔