حکومت و سانحہ زیارت نا دھرنا کمیٹی نا نیام اٹی سرسہب مذاکرات ستا کڑزک،گورنر جعفرخان مندوخیل

گورنر بلوچستان جعفرخان مندوخیل صوبائی حکومت و سانحہ زیارت نا دھرنا کمیٹی نا نیام اٹی سرسہب  مذاکرات آتا ستا ءِ کرسا اودے امن و سوگوی نا کنڈ آ اسہ جوان ءُ پیش رفت اس گوندانے۔ دا پیش رفت صوبہ ٹی سیاسی سوگوی، مدامگی امن نا قیام و چک و تاڑ ءِ کم کننگ اٹی اہم ءُ کڑد اس ادا کیک۔ گورنر مندوخیل پارے کہ سیاسی ہیت و گپ و باہمی افہام و تفہیم درحقیقت تصادم و محاذ آرائی آن زیات بھرمی و معتبر ءُ وسیلہ غاک ءُ۔ گورنر مندوخیل امید پاش کرے کہ سرسہب آ مذاکرات نا رِد اٹ بروک آ ایلو ریسہ غاک ہم جوانی اٹ پورو مریرہ۔ او شہید آتا پدخاہوت نا روا انگا خواست آتیا عملدرآمد و صوبہ ٹی سیکیورٹی نا ویل آتے ایسر کننگ نا بابت سرسہب آ مذاکرات نا بخیر ءِ کرسا دا پت انا درشانی ءِ کرے کہ جوڈیشل کمیشن شفاف و بیدس کنڈ ہلنگ نا جاست پاست ءِ پک کیک۔ امنائی پالیسی نا رِد اٹ سانحہ زیارت نا شہید آتے سرکاری وڑاٹ شہید گوندسا اوفتا خلق خاہوت ءِ کمکی رقم تننگک ہرافتیٹی شہید آتا چنا تا تعلیمی بست و بند، مالی معاوضہ و ایلو حق آک ہم اوار ءُ۔ داڑآن بیدس جتا جتا سرکاری ماڑی تے شہید آتاا قربانی تا شرف اٹی اوفتا پن آتون منسوب کننگک۔