وزیراعلیٰ بلوچستان میر سرفراز بگٹی نا سلابتی کوشست آک بھرم تسر، حکومت و زیارت دھرنا کمیٹی نا نیام اٹی مذاکرات سرسہب
نوشتئی معاہدہ غا دستخط، زیارت واقعہ نا جاست پاست کن جوڈیشل کمیشن جوڑ کننگ آ امنا مس
Get real time updates directly on you device, subscribe now.
وزیراعلیٰ بلوچستان میر سرفراز بگٹی نا سلابتی کوشست آک بھرم تسر، بلوچستان حکومت، شہدائے زیارت نا پدخاہوت و دھرنا کمیٹی نا نیام اٹی ہیت و گپ سرسہبی اٹ پورو مسر۔ دھرنا کمیٹی نا باسک نصر اللہ زیرے نا پاننگ اے کہ مذاکرات نا مسودہ غا ہڑتوم آ کنڈ آتیان اتفاقِ رائے مسنوے، حکومت، لواحقین و دھرنا کمیٹی نوشتئی معاہدہ غا تینا دستخط آتے کریر۔ معاہدہ نا رِد اٹ زیارت واقعہ نا جاست پاست کن جوڈیشل کمیشن جوڑ کننگ آ امنا کننگانے۔ معاہدہ نا نوشتئی ہیت آتا رِد اٹ وزیراعلیٰ بلوچستان نا کماشی ٹی امن و امان آ اسیجائی دیوان اس اڈ ہنگو، ہراٹی اپوزیشن و شہداء نا پدخاہوت ہم بشخ ہلور۔ شہدائے زیارت ءِ سرکاری پالیسی نا رِد اٹ شہید قرار تننگ مرو، لواحقین ءِ معاوضہ، کفالت و چناتے تعلیم فراوان کننگ مرو۔ معاہدہ نا رِد اٹ شہداء نا پن آ سرکاری ماڑی غاتے منسوب کننگ مرو۔ ریونیو نا بابت السی گڑتی تا ایسری کن وزیر ریونیو نا کماشی ٹی اسہ کمیٹی اس جوڑ کننگ مرو۔ وزیراعلیٰ بلوچستان میر سرفراز بگٹی پارے کہ شہداء نا خلق خاہوت نا چاروکی حکومت نا زمواری ءِ۔ شہداء نا نمازِ جنازہ اینو بیگا 4 بجہ غا ایوب اسٹیڈیم اٹی ادا کننگک۔