وزیراعلیٰ بلوچستان میر سرفراز بگٹی و میر سلیم خان کھوسہ نا اوڑدہی، نصیر آباد اٹی دیر نا کاختی آ گپ و تران

وزیراعلیٰ بلوچستان میر سرفراز بگٹی آن پاکستان مسلم لیگ (ن) نا بلوچستان اسمبلی اٹی پارلیمانی لیڈر میر سلیم خان کھوسہ اوڑدہی کرے ہراٹی نصیر آباد ڈویژن اٹی کشاری نا حالیت آتیا خوڑتی اٹ گپ و تران کننگا۔ میر سلیم خان کھوسہ وزیراعلیٰ بلوچستان ءِ نصیر آباد ڈویژن نا ناڑی تیٹی دیر نا بھاز انگا کاختی و داڑان کشاری و کشارگر آتے پیش بروک آ خواری تیان آگاہ کرے۔ وزیراعلیٰ بلوچستان نا  حوالکاری و سیاسی باندات سلاہکار شاہد رند نا رِد اٹ وزیراعلیٰ بلوچستان میر سرفراز بگٹی دا رد اٹ دمدستی وڑاٹ وزیراعلیٰ سندھ سید مراد علی شاہ تون فون آ رابطہ کرے ہرا نا وخت آ ہڑتوم آ وزیراعلیٰ غاتا نیام اٹی دیر نا حالیت و بین الصوبائی آبی باندات آتیا خوڑتی اٹ تبادلہ خیال مس۔ ہڑتوم آ وزیراعلاک بلوچستان و سندھ نا نیام اٹی دیر نا ویل آتا ایسری، دیر نا منصفانہ بشخ و پانٹ و ساڑی آ حالیت آتیٹی جوانی کن تین پہ تینی کمک و اسیجائی گام گیج آتیا امنا کریر۔ شاہد رند نا رِد اٹ ہڑتوم آ وزیراعلیٰ غاک تینا تینا صوبہ غاتا وزرائے آبپاشی ءِ دمدستی وڑاٹ سکھر سر مننگ نا پارت جاری کرینو تانکہ متعلقہ کمامدار آتون اوار دیوان اڈ ترسا دیر نا حالیت نا جاچ ءِ ہلنگ مرے و قابلِ عمل ایسری آ پیش رفت ءِ پک کننگے۔