پاک سعودی واپاری تعلقداری تا سوگوی کن ‘وژن 2030’ اہم ءِ، سیدال خان ناصر

ڈپٹی چیئرمین سینیٹ سیدال خان ناصر پارینے کہ پاک سعودی واپاری تعلقداری نا سوگوی کن ‘وژن 2030’ اہم مزل نا نشان اسے۔ دا خیال آتا درشانی او تدوک آ دے الراعی گروپ نا کنڈ آن اڈ ہلوک “سعودی کمپنی فارمیشن اینڈ بزنس ایکسٹینشن سمٹ 2026” آن تران کرسا کرے۔ دا وخت آ چیئرمین الراعی گروپ بلال ایم زبیر و ایلوفک ہم تران کریر۔ او پارے کہ پاکستان و سعودی عرب نا ایلمی تعلقداری ایمان، پت و اسیجائی شونداری آ سلوک ءِ‘ سعودی وژن 2030 جہانی زرکاری و پرائیویٹ بشخ انا شونداری کن پوسکن ءُ درگہ ملانے۔ سینیٹ و حکومت پاکستان زرگزرانی شونداری‘ روزگار و ٹیکنالوجی نا گدریفنگ کن ہر وڑ انا کمک فراوان کیک۔ وژن 2030 نا رِد اٹ سعودی عرب درملکی کمپنی تے 100 درسَد مالکی حق تننگ اٹی ءِ‘ سعودی عرب اٹی زرکاری کن آسان بینکنگ چینل فراوان و کم آن کم میرات نا شڑت ءِ چٹفنگان۔ اسہ سال آن فعال پاکستانی کمپنیک المی کاغد آتیٹی سعودی زرگزران نا بشخ جوڑ مننگ کیرہ۔ پرائیویٹ بشخ انا رابطہ غاتے سوگو کننگ وخت نا اہم انگا گرج ءِ‘ صدر ایف پی سی سی آئی پاک سعودی واپاری تعلقداری ٹی الراعی گروپ نا گچین کڑد انا ستاءِ کرے۔ سمٹ اٹی پاکستان نا 12 کمپنی تا سروک و سعودی الراعی گروپ نا نیام اٹی تاریخی ایم او یوز آ دستخط کننگا۔ دستخط کروک معاہدہ غاتا رِد اٹ پاکستانی کمپنیک سعودی عرب اٹی زرکاری و کاروبار نا بناءِ کیرہ۔ سمٹ اٹی سفارت کار، پنی آ زرکار و ملکی و درملکی کمپنی تا بڑزکو کمامدار آتا بھلو کچ اس بشخ ہلک۔