ڈیجیٹل و شفاف ٹیکس نظام ءِ حکومت اولیت ایتک، بنجائی وزیر خزانہ محمد اورنگزیب

بنجائی وزیر خزانہ محمد اورنگزیب نا کماشی ٹی ایف بی آر نا نیشنل فیس لیس سینٹر ڈٹ آ پیش رفت نا جاچ ہلنگ کن اہم ءُ دیوان اس اڈ ہلک، ہراٹی ڈٹ انا نفاذ، ٹیکنالوجی ڈویلپمنٹ و ریسہ وڑ رول آؤٹ نا بابت سرجم بریفنگ تننگا۔ دیوان اٹی نیشنل فیس لیس سینٹر ءِ ٹیکس نظام ءِ ڈیجیٹل، شفاف و بنجائی جوڑ کننگ کن اسہ اہم ءُ ڈٹ اس گوندنگا۔ وزیر خزانہ پروجیکٹ مینجمنٹ یونٹ نا جوڑ کننگ آ پیشرفت ءِ است جمی نا سوب گوندسا پارت کرے کہ آپریشنل و ٹیکنالوجی ٹیم تا نیام اٹی بھرمی کمک نا وڑ اٹ ڈٹ انا سرسہب پوروی ءِ پک کننگے۔ دیوان نا وخت آ قاعدہ نا رد اٹ کیس سلیکشن، رسک انجن نا تیاری، ڈیجیٹل انفراسٹرکچر و سسٹم انٹیگریشن آ مروک پیشرفت نا ہم جاچ ءِ ہلنگا۔ محمد اورنگزیب پارت کرے کہ مچ آ ملک اٹی پورو نفاذ آن مست اسہ بھرمی پائلٹ ریسہ اس المی پورو کننگے تانکہ گمانی نزوری تا وخت آ درستی ءِ کرسا نظام ءِ پین جوان کننگے۔ وزیر خزانہ ٹیکس تروک آتا ڈیٹا نا رکھ ءِ بھاز اہم گوندسا سائبر سیکورٹی و انفارمیشن سیکورٹی نا سوگو بست وبند کننگ نا ہم پارت کرے۔ او پارے کہ ڈٹ انا پیش رفت نا باقاعدگی اٹ جاچ ءِ ہلنگے تانکہ کل ہدف آتے پک کروک وخت آ پورو کننگ مرے‘ او دا عزم انا درشانی ءِ کرے کہ حکومت پوسکنوڑ‘ شفاف و پورو وڑاٹ ڈیجیٹل ٹیکس انتظامیہ نا جوڑ کننگ کن پُرعزم ءِ۔