امریکی فوج انا ایران آ ولدا جلہو، کمانڈ ہند، میزائل، ڈرون لائخی تے شِست کننگا،امریکی سینٹ کام

امریکی فوج ایران نا چندی علاقہ غاتیا ولدا جلہو کرینے، ایرانی میڈیا نا رِد اٹ سیریک، اہواز، چا بہار، بندر عباس و قیشم جزیرہ ٹی بھلا دھماکہ نا توار خف تیا تمانے۔ گورنر ہرمزگان نا پاننگ ءِ کہ قیشم اٹی امریکی جلہو اٹی فش پاؤڈر جوڑ کننگ نا فیکٹری ءِ نسخان رسینگا، ولے فیکٹری ہورک ئس ہندا سوب آن جانی نسخان متنے۔ ایلو کنڈ آ امریکی سینٹ کام ایران آ جلہو آتا پوسکن آ ریسہ ءِ پورو کننگ نا پڑو کرسا پارے کہ امریکی لشکر ایران نا کمانڈ ہند، فضائی دفاعی تنصیب، میزائل، ڈرون لائخی و کرکی چاروکی نا ہند آتے شِست کرینے۔ امریکی سینٹ کام نا رِد اٹ بندر عباس اٹی ہم ہدف آتے شِست کننگا، دا جلہو آتا مسخت ہرمز آن تدینگوک آ جہاز آتے کن گڑتی نا سوب مروک آ ایران نا فوجی واکداری ءِ توننگ ءِ۔ امریکی فوج انا پاننگ ءِ کہ ہدف ایران نا ہرمز آن تدینگوک آ جہاز آتے کن گڑتی نا سوب مروک آ فوجی واکداری کچ ئس۔ داسہ نا امریکی جلہو آتیٹی 7 ایرانی فوجی و 30 لس شاری زوال مسنو و 260 آن زیات ایرانی ٹھپی مسنو۔ ایلو کنڈ آ ایران پڑو کرینے کہ ڈیہہ اٹی ساڑی امریکی فوجی تنصیب و بیدادی نا پنجر آتے شِست کننگ نا ریسہ برجا تخنگک۔ ایرانی میڈیا نا رِد اٹ تہران اٹی فضائی دفاعی نظام فعال کننگانے، وخت اس کہ دارالحکومت نا خڑک پاکدشت و پارچین اٹی ہم دفاعی سرجز آتا حوال مِلانے۔ ہندی کمامدار آتا رِد اٹ دے ٹِکی ایران نا شار سمنان اٹی جلہو آتا رند اٹ ہوائی اڈہ نا منہ بشخ ءِ نسخان رسینگا، وخت اس کہ خرم آباد اٹی ہم کیہی دھماکہ غاتا توار خف تیا تمانے۔ بنجائی صوبہ مارکزی نا شار خنداب اٹی ہم پوسکن آ جلہو آتا حوال ارے۔ ایرانی جانجوڑی وزارت نا رِد اٹ اسہ ہفتہ نا تہٹی ایران آ امریکی جلہو آتیٹی داتم اسکان 35 شاری زوال و 300 آن زیات ٹھپی مسنو۔ سویل دیکی ایران نا صوبہ خوزستان نا شار اندیمشک اٹی اسلامی انقلابی گارڈ کور (آئی آر جی سی) دعویٰ کرینے کہ او امریکی MQ-9 ڈرون اس بٹینے۔ داڑان مست ایران نا سویلی کرکی علاقہ غاتیٹی ہم گمانی امریکی جلہو آتا حوال مون آ بسوسس، ہرافتیٹی جزیرہ قشم، بندر عباس، ہرمز تنک انا خڑک انا شار سیریک و سویل دے ٹِکی شار کنارک اوار ءُ۔ ایلو کنڈ آ آئی آر جی سی نا ترجمان پارینے کہ ایرانی کارروائی تا ساڑی آ ریسہ ٹی ڈیہہ اٹی امریکی بیدادی نا پنجر ءِ بھس کننگ آ چکار کننگانے، و بروک آ وخت اٹی پین ریسہ ہم بنا کننگک۔ آئی آر جی سی دا دعویٰ ہم کرینے کہ ڈیہہ اٹی کیہی امریکی فوجی اڈہ غاتے شِست کننگانے۔ ایران نا فوج پارینے کہ او آپریشن لائٹننگ نا دہ میکو ریسہ ٹی بحرین و کویت اٹی ساڑی امریکی ریڈار و دفاعی نظام ءِ شست کرینے۔ ایران کارروائی ٹی بحرین نا شیخ عیسیٰ ایئر بیس آ امریکی لشکر نا حوالکاری نظام، سپر ہاک ریڈار و پیٹریاٹ تنصیب آ ڈرون جلہو آتا دعویٰ کرینے۔