کوئٹہ و تربت ءِ ڈومیسٹک فلائٹ نا کمک اٹ مچ آ پاکستان تون گنڈانن،گورنر بلوچستان جعفر خان مندوخیل

گورنر بلوچستان جعفر خان مندوخیل پارینے کہ اینو نن کوئٹہ و تربت ءِ ڈومیسٹک فلائٹ نا کمک اٹ پاکستان نا غٹ بھلا شار تتون گنڈانن۔ و ان شاء اللہ بھاز زوت الس ءِ ژوب و پنجگور آن ہوائی جہاز آتا ریسہ نا بناءِ کینہ۔ گورنر مندوخیل پارے کہ اینو نا دے پاکستان و خاص کر بلوچستان کن فضائی رابطہ غاتے بحال کننگ نا اسہ گمر نا وخت اسے۔ داکن کن اسہ شرفمندی اسے کہ کم و ود اِراسال انا گونڈ وخت اٹی کوئٹہ ٹو جدہ و کوئٹہ ٹو زاہدان نا جہاز آتا بناءِ کننگ آن پد اینو نن ساؤتھ ایئر لائن نا اولیکو ڈومیسٹک فلائٹ نا بنائئِ کننگ اُن۔ نن اسہ ہندن ءُ آخبت اسے نا خواہندار اُن ہراڑے بلوچستان نا الس کن پاکستان نا ہر چنکا و بھلا شار رسینگ نا وڑ اٹ مرے۔ دا خیال آتا درشانی ءِ او ساؤتھ ایئر لائن لمیٹڈ نا کوئٹہ ٹو تربت اولیکو ڈومیسٹک فلائٹ نا بنائی دود انا بشخ ہلوک آتیا ن تران کرسا پارے۔ دا وخت آ صوبائی وزیر تعلیم راحیلہ حمید خان درانی، باسک صوبائی اسمبلی رحمت صالح بلوچ، ساؤتھ ایئر لائن لمیٹڈ نا بریگیڈیئر عامر ابرار، بی آر ایس پی نا چیف ایگزیکٹو آفیسر ڈاکٹر طاہر رشید، پرنسپل سیکرٹری ٹو گورنر بلوچستان عبدالناصر دوتانی، جی ایم بلوچستان ایس او ایس گروپ آف کمپنیز عبد الستار اچکزئی و کوئٹہ انٹرنیشنل ایئرپورٹ نا منیجر خالد خان کاکڑ ئسک ہم ساڑی ئسر۔کوئٹہ آن ساؤتھ ایئر لائن نا اولیکو ڈومیسٹک فلائٹ نا بنائی دود آن تران کرسا گورنر بلوچستان جعفر خان مندوخیل پارے کہ اینو نا دے پاکستان و بلوچستان کن اسہ گمر و تاریخی ءُ وخت اسے۔ کوئٹہ آن تربت اولیکو فرسٹ فلائٹ اٹی مسافر آتا داخہ در بھلا کچ ہی ساؤتھ ایئر لائن لمیٹڈ نا سرسہبی نا ضمانت ءِ۔ گورنر بلوچستان جعفر خان مندوخیل سول ایوی ایشن اتھارٹی و ساؤتھ ایئر لائن آ زور شاغا کہ او زوت تاریخی شار ژوب آن ڈیرہ اسماعیل خان، اسلام آباد و ملتان و پنجگور آن کراچی و کوئٹہ اسکان جہاز آتا بناءِ کیر۔ دا وخت آ صوبائی وزیر تعلیم راحیلہ حمید خان درانی ساؤتھ ایئر لائن نا اولیکو ڈومیسٹک فلائٹ نا بنائی دود انا بشخ ہلوک آتیا ن تران کرسا پارے کہ تدوک آ منہ سال آن بلوچستان نا الس ءِ پاکستان نا ایلو بھلا شارتسکان ہوائی جہاز انا کمک اٹ سرمننگ اٹ مشکلات مون تروک ئسر و اینو ساؤتھ ایئر لائن لمیٹڈ داڑے شدت اٹ محسوس مروک آ کمتی ءِ پورو کرسا بلوچستان نا الس نا است ءِ کٹانے۔ اینو ساؤتھ ایئر لائن کوئٹہ و تربت ءِ پاکستان نا غٹ بھلا شارتتون گنڈسا فرسٹ ڈومیسٹک فلائٹ نا بناءِ کرینے۔باسک صوبائی اسمبلی رحمت صالح بلوچ پارے کہ اینو بلوچستان اٹی فضائی رابطہ غاتا اسہ پوسکن ءُ چرجوئی اس بناکرے ہرانا سخت گرج ئس۔ رکھوک و ترند رفتار ہوائی سفر نا آسراتی دومننگ آن مخلوق ءِ تینا نہادی وخت، انرجی و شکست آتیان رکھنگ اٹی کمک رسینگک۔ رحمت صالح بلوچ پنجگور آن ڈومیسٹک فلائٹ نا بناءِ کننگ نا خواست ءِ کرسا پارے کہ ہوائی سفر نا آسراتی تا فراوانی آن بھاز انگا آسانی ودی مریک۔ پنجگور، تربت و گوادر پین پین اٹی قومی شاہراہ تا جوڑ کننگ و و ہوائی سفر نا آسراتی تا فراوانی ٹی گورنر بلوچستان نا خاص کمک و مخ تفی دوئی ئس ہراڑآ نن غٹ علاقہ نا الس نا کنڈآن منت واری ءِ ہرفنہ۔ داکان مست گورنر بلوچستان جعفر خان مندوخیل ساؤتھ ایئرلائن لمیٹڈ نا کوئٹہ غان اولیکو جہاز و اونا دفترنا باقاعدہ بناءِ کرے۔