پولیو نا پورو چٹفنگ کن ہر چنا اسکان رسینگ ءِ پک کننگے،کمشنر لورالائی ڈویژن ولی محمد بڑیچ

کمشنر لورالائی ڈویژن ولی محمد بڑیچ نا کماشی ٹی ڈویژنل پولیو ٹاسک فورس نا اہم ءُ دیوان اس اڈ ہلک، ہراٹی بروک آ پولیو تور مہم نا تیاری، مسکوہی مہم نا کارکرد و چناتے پولیو آن رکھنگ کن ہرفوک آ گام گیج آتا سرجم جاچ ہلنگا۔ دیوان اٹی ڈسٹرکٹ ہیلتھ آفیسر لورالائی ڈاکٹر مقبول احمد تون اوار ڈویژن نا کل ضلع غاتا ڈسٹرکٹ ہیلتھ آفیسر، پی پی ایچ آئی، جہانی جانجوڑی ادارہ (ڈبلیو ایچ او)، جانجوڑی محکمہ، ایمرجنسی آپریشن سینٹر (ای او سی) و گنڈوک ادارہ غاتا افسر آک بشخ ہلکر۔ دیوان نا وخت آ کل ضلع غاتا ہیلتھ افسر آک پولیو تور مہم نا پیش رفت، چناتسکان رسینگ، ٹیم آتا کارکرد، سلوک چناتا کچ، سیکورٹی بست و بند و مائیکرو پلاننگ نا بابت سرجم بریفنگ تسر۔ بشخ ہلوک آتے پاننگا کہ پولیو نا پورو چٹفنگ کن ہر چنا اسکان رسینگ ءِ پک کننگ و مہم ءِ سد درسد سرسہب کننگ کن کل دوئی وسیلہ غاتے کاریم اٹ اتنگ انگ ءِ۔ دیوان آن تران کرسا کمشنر لورالائی ڈویژن ولی محمد بڑیچ پارے کہ پولیو اسہ کسفوک و مچ آ زند انا نیم جان کننگ نا سوب جوڑ مروک ءُ ناجوڑی اسے، ہرانا پورو چٹفنگ حکومت، جانجوڑی محکمہ، لمہ باوہ و راج انا ہر بندغ نا اسیجائی زمواری ءِ۔ او پارے کہ پولیو نا برخلاف برجا مہم ءِ قومی زمواری سرپند مرسا ہر چنا ءِ رکھی پڑی کنفنگ ءِ پک کننگے تاکہ ہچ ءُ چنا اس دا ناچوڑ آ ناجوڑی آن زہمی مف۔ کمشنر کل ضلعی انتظامیہ و جانجوڑی محکمہ نا افسر آتے پارت کرے کہ پولیو ٹیم آتا بھرمی چاروکی، مُر انگا و سخت انگا کسر تیا علاقہ غاتیٹی چناتسکان رسینگ، غیر حاضر و نمن مروک آ لمہ باوہ غاتتون بھرمی رابطہ، و مہم نا وخت آ ڈیٹا نا پک رپورٹنگ ءِ امر کہ مرے پک کننگے۔ او پارے کہ پولیو نا چٹفنگ کن بین الادارہ ئی کمکاری المی ءِ و کل گنڈوک محکمہ غاک تینا زمواری تے پورو وڑ اٹ سر ایتر۔ دیوان اٹی دا ہیت آ ہم زور شاغنگا کہ الس اٹی پولیو ویکسین نا بابت سُج پام تالان کننگ کن عالم دین، قبائلی متبر، استاد، گچین مروک آ نمائندہ و میڈیا نا کڑد بے کچ اہم ءِ۔ لمہ باوہ غاتیان خواست کننگا کہ او پولیو ٹیم آتتون پبی کمکاری کیر و پنچ سال آن کم ووَد ہر چنا ءِ پولیو آن بچفنگ نا پڑی المی کنفر، انتئے کہ وار وار کنفنگوک آ پڑی چناتے دا ناچوڑ آ ناجوڑی آن پورو رکھ فراوان کننگ نا اسٹ انگا کسر ءِ۔ دیوان نا گڈسر اٹی کمشنر ولی محمد بڑیچ پولیو مہم نا سرسہبی کن کل گنڈوک ادارہ غاتا نیام اٹی سوگو رابطہ، بھرمی سُج پام و فیلڈ اٹی پدریسہ چاروکی نا پارت کرسا دا ارادگی نا درشانی ءِ کرے کہ لورالائی ڈویژن ءِ پولیو فری جوڑ کننگ کن کل وسیلہ غاتے کاریم اٹ اتنگک۔ لورالائی (میر محمود بلوچ)