مسلم لیگ اٹی سینئر راہشون یا کارندہ غاتتون بے انصافی مفک،شیخ جعفر خان مندوخیل

گورنر بلوچستان شیخ جعفر خان مندوخیل تون پاکستان مسلم لیگ (ن) مکران ڈویژن نا صدر اشرف ساگر بلوچ، مسلم لیگ (ن) بلوچستان نا سینئر راہشون و قبائلی شخصیت ارباب اقبال کاسی و مسلم لیگ (ن) بلوچستان نا سینئر راہشون و وائس پریذیڈنٹ رخشان ڈویژن حاجی نثار احمد گورنر ہاؤس اٹی اوڑدہی کریر۔ اوڑدہی نا وخت آ بلوچستان نا ساڑی سیاسی حالیت، صوبائی حکومت نا کارکڑد‘ پارٹی باندات تنظیمی و بروک آ سج پام آ سرجمی اٹ گپ وتران کننگا۔ دا وخت آ پارٹی ءِ پین فعال و سوگو جوڑ کننگ، کارندہ غاتا ویل آتا ایسری و السی خذمت نا عمل ءِ بھرمی وڑ اٹ مونی دننگ آ ہم گپ و تران مس۔ گورنر بلوچستان شیخ جعفر خان مندوخیل پارے کہ پاکستان مسلم لیگ (ن) نا ہر کارندہ و ہر سینئر راہشون پارٹی نا نہادی میرات ءِ‘ ساڑی صوبائی حکومت اٹی پارٹی نا سوگو و بھرمی پوزیشن کارندہ و راہشون تا مرغن آ جہد، وفاداری و قربانی تا بھرم ءِ‘ او پارے کہ انشاء اللہ مسلم لیگ (ن) اٹی اسہ سینئر راہشون یا کارندہ اسے تون بیدادی مفک بلکن میرٹ، سلاہ و انصاف ءِ ہر کہول آ پک کننگک۔ او مستی پارے کہ پاکستان مسلم لیگ (ن) نا حکومت مدام بلوچستان نا تعمیر و شونداری، السی آسودہی و سیاسی سوگوی کن عملی گام گیج کرینے ہرافتا جوان بھرم مون آ بننگ اٹی ءِ‘ گورنر ناوڑ اٹ ای کوشست کرینُٹ کہ صوبہ ٹی سیاسی ہم گرنچی، جمہوری روایت و تین پہ تینی شرف ءِ شون تننگے تانکہ بلوچستان شونداری و شونہالی نا کسر آ روان مرے۔ دا وخت آ مسلم لیگ (ن) نا سینئر راہشونک گورنر بلوچستان شیخ جعفر خان مندوخیل نا سیاسی بصیرت، سرکڑدہی و صوبہ ٹی ہم گرنچی نا شون اکن کروک جہد انا ستاءِ کرسا پاریر کہ او گورنر نا منصب ءِ سنبھالنگ آن پد بلوچستان اٹی مفاہمت، سیاسی سوگوی و تین پہ تینی پت انا چاگڑد ءِ سوگو کننگ اٹی اہم ءُ کڑد اس ادا کرینے ہراڑان پارٹی کارندہ و الس اٹی پت ودی مسنے۔ اوڑدہی جوان چاگڑد اٹی ایسر مس ہراٹی پارٹی ءِ پین منظم، فعال و السی خذمت نا جوزہ اٹ مونی دننگ نا عزم انا درشانی کننگا۔ گوادر (نامہ نگار)