آبنائے ہرمز و داپار ایپار اٹ آئل ٹینکر آتیا جلہو نا مذمت ءِ کینہ،انٹرنیشنل میری ٹائم آرگنائزیشن

اقوامِ متحدہ نا شیفکو ادارہ انٹرنیشنل میری ٹائم آرگنائزیشن (IMO) آبنائے ہرمز و اونا چارمہ کنڈ آ آئل ٹینکر آتیا جلہو آتا سخت انگا لوز آتے ٹی مذمت ءِ کرسا دمدستی وڑاٹ بے چیٹی ءِ چٹفنگ و جلہو آتے توننگ نا خواست کرینے۔ آئی ایم او نا ترجمان پارینے کہ ادارہ ساڑی جلہو آتیا سخت گڑتی نا درشانی ءِ کیک و تعلقدار کمامدار آتون اواری اٹ واقعہ نا سرجم حوال آتے پک کننگ اٹی ءِ۔ ترجمان نا رِد اٹ، “نن دا جلہو آتا پورو مذمت ءِ کینہ، بے چیٹی نا دا ریسہ ءِ دمدستی وڑاٹ بایدے چٹفنگے۔” ادارہ پارینے کہ ڈیہہ اٹی بے چیٹی ودنگ آن پد او زہمی فریق آتون پدریسہ رابطہ ٹی ءِ۔ آبنائے ہرمز اٹی جہاز رانی زہمی مننگ نا سوب آن اختہ مروک سمندری جہاز آتے کن رکھوک آ پیش تمنگ نا کسر ہم جوڑ کننگ انگ اٹی ءِ۔ آئی ایم او غٹ تعلقدار فریق آتیا زور شاغانے کہ او صبر و تحمل نا درشانی ءِ کیر، پین بے چیٹی آن پاناد کیر و ویل آتا ایسری کن مذاکرات نا کسر ءِ تینائی کیر تانکہ سمندری کارندہ غاتا جان و جہانی جہاز رانی نا رکھ ءِ پک کننگ مرے۔ ایلو کنڈ آ اقوامِ متحدہ نا ہائی کمشنر انسانی حق وولکر ترک پارینے کہ آبنائے ہرمز نا بند مننگ نا بابت حوال آک بھاز گڑتی ناسوب ءُ انتئے کہ اونا زہم ڈیہہ آن پیشن مچ آ دنیا ٹی انسانی حق و کروڑ آ بندغ آتا زند آتیا تمنگ کیک۔ او پارے کہ کنشت‘ دارو و ایلو المی گڑا غاتا فراوانی ٹی اڑاند نا سوب آن بھلو زرگزرانی و انسانی تنکی ودی مننگ کیک، ہندا سوب آن سفارت کاری، صبر و تحمل و بے چیٹی ٹی کمتی ءِ اولیت تننگے۔ وولکر ترک ایران و امریکہ نا کنڈ آن رپورٹ مروک آ جلہو آتے دمدستی وڑاٹ توننگ و جہانی کانود نا رِد اٹ جنگ بندی آ عملدرآمد ءِ بحال کننگ نا خواست ہم کرے۔