وکیل آتا فیس آتے تننگ کپروک شاری تے کن کمک ننا وژن ءِ،گورنر بلوچستان جعفرخان مندوخیل

کوئٹہ، گورنر بلوچستان جعفرخان مندوخیل پارینے کہ صوبہ نا ہمو شاریک ہرافک وکیل نا کبین آ فیس و بھلا عدالتی کارروائی تا خڑچ آتے تننگ کپسہ اوفتے وخت آ و آسان انصاف فراوان کننگ حکومت نا بنداوی زمواری ءِ‘ ہندا مسخت نا رد اٹ صوبائی محتسب نا ادارہ غاتے پین فعال، گچین و السی ویل آتا ایسری کن اسہ پتدار فورم اس جوڑ کننگ کن گام گیج کننگ اٹی ءُ۔ ننا کوشست ءِ کہ ہچ ءُ غریب اس تینا روا انگا حق انا دوئی کننگ آن محروم مف و اودے انصاف کن در در آ خواری کروئی تمپ۔ دا خیال آتا درشانی ءِ او گورنر ہاؤس اٹی جتاجتا سرکاری محکمہ غاتا برخلاف دوئی مروک السی غاو و درخواست آتا ہفتہ وار سماعت نا وخت آ کرے‘ گورنر جعفرخان مندوخیل پارے کہ راج انا نزور و محروم تپہ غاتے انصاف نا فراوانی بیرہ اسہ انتظامی گرج اس اف بلکہ ریاست نا اہم آئینی، اخلاقی و راجی زمواری ءِ‘ ہراتم لس شاری ءِ بیدس سٹی ہُرے و مالی باریم آن انصاف دوئی مریک تو سرکاری ادارہ غاتیا اونا پت ہم سوگو مریک‘ بریبری حق، راجی انصاف و السی داد رسی نا گچین نظام اسہ زموار حکومت اسے نا پجار ءِ‘ او صوبائی محتسب ءِ پارت کرے کہ ادارہ نا جم کارکڑد ءِ گچین جوڑ کننگ، السی غاو تا درج کننگ‘ اوفتا بے کنڈ ہلوک جاست پاست و وخت آ فیصلہ غاتا نظام ءِ پین گچین جوڑ کننگے۔ او دا ہیت آ زور شاغا کہ صوبائی محتسب نا ادارہ شاری تیکن ہندن ءُ رسینگ گیگ فورم اس مرے ہراڑے اوفتے تینا روا انگا حق آتا دوئی کننگ کن بھلا کانودی ول ویچڑی و بھلا خڑچ آتے مون تروئی تمپ۔ گورنر بلوچستان پارے کہ سرکاری ادارہ اسے نا کارکڑد نا حقی کچ اونا ماڑی‘ وسیلہ یا انتظامی پنجر آخا بلکہ الس ءِ فراوان کروک آسراتی و اوفتا ویل آتا ایسری ٹی اونا سنجیدگی ءِ‘ او مستی پارے کہ انصاف نا فراوانی ٹی ہُرے مننگ خاص وڑ اٹ غریب بندغ آتیکن کیہی درکچ زیات مشکل ودی کیک۔ ہندا سوب آن المی ءِ کہ السی ویل آتا ایسری کن سادہ، شفاف و بھرم تروک وڑوڈول تینائی کننگے‘یات سلے کہ گورنر ہاؤس نا غاو سیل انا رد اٹ اڈ ہلوک دا ہفتہ وار سماعت اسہ نیم عدالتی فورم، ہرادے کانودی اصطلاح ٹی کوازی کورٹ (Quasi Court) پاننگک، نا وڑ اٹ کاریم کیک۔ دا فورم نا کمک اٹ جتاجتا سرکاری محکمہ غاتا برخلاف شاری تا غاو تا جاچ ءِ ہلسا تعلقدار کانود و ضابطہ نا رد اٹ اوفتا ایسری کن گام گیج کننگک۔