ناجوڑ آتا ودوک آ کچ انا رد اٹ آسراتی تیٹی گچینی کن گام گیج کننگے،ڈپٹی کمشنر نصیرآباد

ڈپٹی کمشنر نصیر آباد وریندر لعل ءِ ڈویژنل ہیڈ کوارٹر ہسپتال نا میڈیکل سپرنٹنڈنٹ ڈاکٹر حبیب اللہ پندرانی ہسپتال اٹی تننگوک طبی آسراتی، جتا جتا بشخ آتا کارکڑد جم انتظامی حالیت آتیا سرجم بریفنگ تس۔ بریفنگ نا وخت آ اودے دارو تا دوئی مننگ‘ لمہ و چنا نا جانجوڑی نا بابت کروک گام گیج، او پی ڈی ٹی ہڑدے بروک ناجوڑ آتا کچ، آپریشن تھیٹر نا کارکڑد‘ ڈاکٹر و پیرامیڈیکل اسٹاف نا حاضری، مون تروک ویل و برجا شونداری ڈٹ آتا بابت ڈپٹی کمشنر ءِ آگاہ کننگا۔ میڈیکل سپرنٹنڈنٹ بریفنگ ترسا مستی پارے کہ ہسپتال اٹی الس ءِ آب اٹو و وخت آ طبی آسراتی تا فراوانی کن کل دوئی وسیلہ غاتے کاریم اٹ اتنگ انگ ءِ‘ او مستی پارے کہ ناجوڑ آتا ودوک آ کچ انا سوب آن آسراتی تیٹی پین جوانی اتنگ کن عملی گام گیج آک برجا ءُ۔ دا وخت آ ڈپٹی کمشنر وریندر لعل ہیت وگپ کرسا پارے کہ ڈویژنل ہیڈ کوارٹر ہسپتال غریب الس الس کن اسہ اہم ءُ سیبو و اومیت اسے‘ہندا سوب آن داڑے بروک ہر ناجوڑ ءِ گچین گمانی درمان و آسراتی فراوان کننگ ضلعی انتظامیہ نا اولیکو زمواری ءِ‘ او پیدوار کرے کہ ڈاکٹر و پیرامیڈیکل اسٹاف نا تعیناتی نا بنداوی مسخت الس نا خذمت و اوفتا ویل آتا وخت آ ایسری ءِ‘ ہندا سوب آن ہچ ءُ وڑ اسے نا ڈیوالئی، بے پراوہی یا کمتی ہچ سگنگ مفک۔ ڈپٹی کمشنر پارت کرے کہ کل ڈاکٹر و کارندہ غاک تینا زمواری تے ایمانداری، کسبی لائخی و احساسِ زمواری اٹ سر ایتر‘ ناجوڑ آتتون ہمدردی اٹ و جوان وڑ اٹ پیش بریر و درمان نا کل ریسہ غاتیٹی بڑزکو آب ءِ پک کیر۔ او مستی پارے کہ ہراتم ناجوڑ درمان آن پد است جمی اٹ کاہک و انتظامیہ کن دعا کیرہ، تو ہندا ہیت انا پیدوار شاہدی مریک کہ کارندہ غاک تینا زمواری تے جوان وڑ اٹ سرتننگ اٹی ءُ۔ ڈپٹی کمشنر دارو تا فراوانی نا نظام ءِ پین بھرمی جوڑ کننگ نا پارت کرسا پارے کہ ہسپتال اٹی ساڑی دارو و اوفتا بشخ و بانٹ نا پورو و شفاف ریکارڈ تخنگے تانکہ ناجوڑ آتے وخت آ آسراتی فراوان کننگ مرے۔ اخیر اٹی او ہسپتال انتظامیہ ءِ مون تروک ویل آتا دمدستی ایسری و برجا شونداری ڈٹ آتا وخت آ پوروی کن ہر وڑ انا کمک نا باوری کرفے و تعلقدار کمامدار آتے دا رد اٹ بھرمی گام گیج کننگ نا پارت ہم کرے۔