آغا سید علی محمد شاہ ہاشمی یکپاسی چشتی

یک شنبے 30 اکتوبر 2022ء نا دے آماچ ادبی دیوان بلوچستان مستونگ نا پارہ غان براہوئی، اردو و فارسی زبان نا پنی آ شاعر، ادیب، دانشور و بزرگ آ شخصیت ایماندار سید السادات آغا سید علی محمد شاہ ہاشمی یکپاسی چشتی نا یات اٹ اونا کزیہ و چلِم نا رد اٹ اسہ دے ئی ءُ تعزیتی ریفرنس، و بین اللسانی مشاعرہ اس اڈ تننگا۔ پروگرام نا اولیکو بشخ تعزیتی ریفرنس ئسکہ۔ ہراٹی پنی آ دانشور آک آغا علی محمد شاہ ہاشمی نا زند و بود و فن و شخصیت آ تینا پر مغز آ مقالہ غاتے خوانار، دا اولیکو بشخ اٹی مجلس نا کماشی ءِ آماچ ادبی دیوان بلوچستان مستونگ نا صدر پنی آ شاعر ادیب حاجی شاہ بیگ شیدا کرے۔ ہندن خاص انگا مہمان علی محمد شاہ ہاشمی نا ایلم خواجہ پروفیسر آغا حسن شاہ ہاشمی ئسکہ۔ اعزازی مہمان نا کڑسی آ یکپاسی ٹرسٹ نا منصبدار پنی آ نعت خوان مولوی علی احمد شاہوانی زنڈوک ئسکہ۔ پروفیسر حسن ناصر اولیکو بشخ انا شونکاری نا شرف ءِ دوئی کرے۔ اوڑتون کمک کن گچین آ شاعر ادیب و پولکار حمید عزیز آبادی ہم اسٹیج آ شونکاری کن ساڑی ئسکہ۔ پروگرام نا بنا تلاوت کلام پاک آن مس، و ہندن نعت شریف اس پاننگا۔ دا تعزیتی ریفرنس نا رد اٹ ایماندار آغا علی محمد شاہ ہاشمی، فن و شخصیت آ مقالہ خوانوک آتیٹی سید غریب شاہ انجم، حمید عزیز آبادی، حاجی عبدالحیات منصور، بہاول نسیم اسک اوار ئسر۔ اوفک تینا مقالہ غاتے پیش کریر، و پاریر کہ آغا علی محمد شاہ ہاشمی اسہ چنکو وخت اسے ٹی براہوئی زبان کن کوڑ اس خذمت کرسا دا دنیا غان موکل کرے۔ و تینا پن ءِ مدامی کن زندہ تخا۔ اونا کروک آ ادبی کاریمک براہوئی زبان نا دینی ادب نا بشخ اٹی بھاز بھلو مڈی اسے ءُ۔ ایماندار آغا علی محمد شاہ ہاشمی اسہ مہربان ءُ شخصیت اسے نا خواجہ ئسکہ۔ اونا مجلس آن بندغ نئے بیرہ فیض ہرفیکہ، بلکن اونا علمی و دینی آ گپ و تران آک مجلس نا چاگڑد ءِ زباد آن شُپ کریرہ۔ ایماندار آغا علی محمد شاہ ہاشمی نا کزیہ غان براہوئی زبان و ادب نا پڑ ءِ اسہ بھاز بھلو نسخان اس رسینگا۔ و اونا کمتی سال آتسکان پورو مننگ کپک۔ مجلس نا اعزازی مہمان تران تون اوار حاجی شاہ بیگ شیدا نا نوشتہ کروک ءُ منقبت اس ہم پیش کرے۔ ہرا بنوک آتے بھاز دوست بس۔ ہندن آغا علی محمد شاہ ہاشمی نا ایلم و پروگرام نا خاص انگا مہمان پروفیسر سید حسن شاہ ہاشمی تینا تران اٹی پارے کہ ایماندار علی محمد شاہ ہاشمی ننا خاہوت اٹی نئے بیرہ کل آن زیات علمی و ادبی گشاد تخاکہ، بلکن او ننا خاہوت نا سرخیل ہم ئسکہ۔ ایماندار اسہ گچین ءُ زند اس گدریفے، اونا رجحان اول سر آن دین، علم و کتاب آتتون ئسکہ۔ ہندا سوب آن او تینا وتاخ اٹی اسہ لائبریری اس ہم جوڑ کرے۔ ہراٹی نایاب آ دینی، علمی و ادبی نسخہ غاک تخوک ءُ۔ او پارے کہ آغا علی محمد شاہ ہاشمی مستونگ کن اسہ علمی ءُ تمبہ اس ئسکہ۔ اونا بے وخت آ کزیہ نئے بیرہ ننا خاہوت ءِ ڈکھیا کرے، بلکن ای خنوہ کہ علمی و ادبی پڑ آ ساڑی قلم خواجہ غاک ہم اونا کزیہ غان بھاز مونجا ءُ۔ دعا کبو کہ اللہ پاک آغا علی محمد شاہ ہاشمی نا مغفرت ءِ کے، و اونا ادیرہ ءِ نور آن پر کے۔ مہمان خاص آماچ ادبی دیوان نا منصبدار و باسک آتتون اوار اوار مجلس اٹی ساڑی کل قلم خواجہ غاتا تورو ءِ ہرفسا پارے کہ نم تینا حق ءِ ادا کریرے، نن و ننا خاہوت بروک آ وخت اٹی علم و ادب نا شونداری و تالانی کن مدام نم تون کمک کرو۔

دا مجلس نا کماشی ءِ کروک آ بزرگ آ شخصیت گچین آ شاعر ادیب و آماچ ادبی دیوان مستونگ نا صدر حاجی شاہ بیگ شیدا تران کرسا پارے کہ شاہ صاحب ایماندار تون کنا بھلو خڑکی اس ئسکہ۔ ای مدام اونا مجلس آن فیض ہرفسا بسنٹ، و کنے آ اونا بے کچ اثر آک ہم اریر، حاجی صاحب آغا علی محمد شاہ ہاشمی نا خڑکی نا دے تے یات کرسا گلوتہ ہم مس۔ داڑان دا پک مریک کہ اونا و آغا علی محمد شاہ ہاشمی نا ادبی و مجلسی خڑکی بے کچ زیات ئسکہ۔

پروگرام نا ارٹمیکو بشخ کل بلوچستان بین اللسانی مشاعرہ غا تالان ئسکہ۔ مشاعرہ نا کماشی ءِ پنی آ شاعر ادیب افسانہ نگار دانشور آماچ ادبی دیوان مستونگ نا بنجائی جنرل سیکرٹری استاد محمد رحیم نازکرے۔ و ہندن خاص انگا مہمان سخاوت ادبی کاروان کوئٹہ نا بنجائی کماش پنی آ استاد شاعر شاکر ندیم ئسکہ۔ اعزازی مہمان تیٹی سیوت ادبی دیوان کوئٹہ نا کماش پنی آ شاعر و پولکار سائر عزیز، دے ٹک ادبی دیوان مستونگ نا جنرل سیکرٹری براہوئی و اردو نا پنی آ شاعر و قلمکار بہاول نسیم بنگلزئی، شال ادبی دیوان کوئٹہ نا کماش پرفکر آ شاعر اعجاز سنگت، سنبھال ادبی دیوان مستونگ نا کماش پنی آ شاعر سائیں آغا انور شاہ دوپاسی، کوہِ ماران ادبی دیوان منگچر نا کماش پنی آ شاعر اکبر نسیم، شاشان انجمن شعراء مستونگ لڑ انا صدر و کہنہ مشق آ شاعر بشیر احمد شاد، پنی آ شاعر فتح محمد شاد، شاشان ادبی کاروان نا منصبدار ورنا غا شاعر غلام نبی صیاد اسک اوار ئسر۔ دافتیان بیدس براہوئی اکیڈمی مستونگ لڑ انا صدر گچین آ پولکار محمد اسلم بنگلزئی اسک ہم ساڑی مرسا علی محمد شاہ ہاشمی نا فن و شخصیت آ تینا گچین آ خیال آتا درشانی ءِ کریر۔

مشاعرہ نا شونکاری نا زمواری تے سید غریب شاہ انجم و حمید عزیز آبادی سر تسر۔ تلاوت قرآن پاک آن گڈ سعید حسرت نعت شریف اس پیش کرے۔

مشاعرہ ٹی حاجی شاہ بیگ شیدا، استاد رحیم ناز، شاکر ندیم، سائر عزیز، مولوی محمود ابابکی، اعجاز سنگت، استاد فتح محمد شاد، سائیں انور شاہ دوپاسی، حمید عزیز آبادی، سید غریب شاہ انجم، بہاول نسیم، بشیر احمد شاد، اکبر نسیم، غلام نبی صیاد، بابل نور، اے جی بلوچ، حاجی مجید خیر، سنگت منان، سلام جانان چلتنی، ظفر معراج، بابل نسیم، جاوید ہمراز، وحید زیب، حسنین معاویہ، جاوید فراز، سحر آصف، عبدالسلام شہزاد کنول، رحیم ویدن، سعید احسان، قادر نسیم، سعید ناسخ، اطہر ابابکی، استاد یار جان راہی، علی رضا، فرمان نسیم، عطاء انجم، سعید حسرت، شاہد شاکر، حسین شہزاد، احسان مومن، صفی سرباز، صالح مسرور، اکبر شاکر اسک تینا شاعری تے بنفیر۔ ہندن بی ایس او پجار نا کماش نثار بلوچ، ناصر بلوچ، و نیشنل پارٹی نا عارف بلوچ اسک ہم مشاعرہ ٹی ساڑی ئسر، و تران کریر۔

ہفتئی تلار
تاک: 43
19-25 November 2022