ہدایت فدا

پنی آ شاعر ادیب ہدایت اللہ نا تخلص ”فدا“، قلمی پن ہدایت فدا ءِ۔ اونا باوہ شرفدار نا پن محمد انور، قبیلہ شاہوانی (کلوزئی)، جہی ہند قمرٹُل کھڈ کوچہ، ضلع مستونگ ءِ۔ ہدایت فدا 10 اکتوبر 1987ء نا دے ودی مسنے۔ او تینا بنائی دینی تعلیم آن بیدس میٹرک کرینے۔

ہدایت فدا، براہوئی زبان و ادب نا گڑتی ءِ است اٹی تخسا 2003ء آن تینا شاعری نا استاد پنی آ شاعر ادیب استاد شاکر ندیم نا شاگردی ٹی بنا ءِ کرے۔ او دا وخت آ اسہ گچین ءُ شاعر ادیب اسے نا حیثیت اٹ براہوئی ادب نا پڑ آ گچین ءُ ادبی کڑد ادا کننگ اٹی ءِ۔

ہدایت فدا نا شاعری نا کتاب ”زوار“ نا پن اٹ آماچ ادبی دیوان مستونگ نا کنڈ آن شینک مسنے۔ اونا شاعری ٹی روانی، ہنینی، راجی شرحالی، وزن نا خیالداری تون اوار خیال و فکر انا ہم اسہ کڑمبی اس خننگک۔ اونا شاعری نا کتاب ادب نا پڑ آ بھلو پذیرائی اس دوئی کرینے۔

او تینا اسہ شاعری سے ٹی پارینے:

ای جنگ کیوہ بقاء کن تینا

کنے خلیس اف فنا کن تینا

کنے گر ہچ اس نی تکپیسہ

ای گنج اسے اُٹ اُرا کن تینا

ہدایت فدا نا شخصیت اٹی سادہی، سچائی، مہر، رواداری، ادب دوستی، ورنا شاعر آتا است بڈی آن بیدس ادب نا تالانی نا ہم جوزہ غاک خننگرہ۔ او پنی آ ادبی ادارہ دے ٹک ادبی دیوان مستونگ نا عہدیدار اسے نا وڑ اٹ ادب نا پڑ آ گچین ءُ خذمت سر تننگ اٹی ءِ۔

دے ٹِک ادبی دیوان مستونگ نا ایلو شاعر ادیب خواجہ غاک کہ اوفتیٹی عبداللہ جوہر، اے جی بلوچ، بہاول نسیم و ایلو سنگت آک اوار ءُ، براہوئی زبان و ادب نا دا نہال ءِ سدائی خرن تخنگ کن جوان کاریم کننگ اٹی ءُ۔ ہدایت فدا مستونگ آن پیشن ہم اڈ تروک آ ادبی کچاری تیٹی اوار مرسا براہوئی زبان و ادب نا تالانی نا جہد اٹی تینا بشخ ءِ شاغنگ اٹی ءِ۔

ہدایت فدا ورنا شاعر ادیب آتا است بڈی ءِ کیک، اوفتے ادب نا پڑ آ ادبی کاریم کننگ نا وڑ اٹ جوڑ کننگ کن کڑد ادا کیک۔ اونا شاعری و نوشت آک براہوئی رسالہ و اخبار تیٹی شینک مرسا کیرہ۔

ہدایت فدا ہمو شاعر ادیب آتیان اسٹ ءِ کہ او سدائی براہوئی زبان و ادب نا شونداری، راج انا راہشونی تون اوار قلم تون دوستی کننگ نا ہم گڑتی ءِ است اٹ تخک۔

ہفتئی تلار
تاک: 43
19-25 November 2022