”خدایا ایں کرم بارے دگر کن“

ڈغار نا ٹک مچ آ کائنات نا اسہ اکائی یا بشخ اسے، ہرادے دا شرف و عزت بشخنگا کہ دانا سینہ غا وجہِ کائنات سید المرسلین حضرت محمد مصطفیؐ ءِ مبعوث کننگا، دا کائنات نا زرہ زرہ اخس کہ روشنائی مرے، ولے رسول اکرمؐ نا ودی ہند مننگ نا سوب آن پورو آ کائنات اٹی دا گلزمین نا روشنائی کل آن زیات ءِ۔ 

”ولسوفَ یعطیکَ ربُک فترضی“

(الضحیٰ، آیت 5)

مَٹ: ”بھاز زُو نما رب نمے ہنداخہ عطا کرو ءِ کہ نم راضی مرورے۔“

کریم انگا رب ہراتم کہ ڈغار ءِ رسول پاک نا ودی ہند مننگ نا شرف ءِ بشخا تو پورو آ گلزمین تینا دا بختاوری آ ناز کرسا گل و گلزار مرسا زباد آتے تالان کرے۔ ترند انگا تہوک سبک رفتار آ چرک آتیٹی بدل مسر۔ زبکہ کروک آ خاخر تا زراب آک ہم سہب انا پدین آ گہوش جوڑ مرسا آسراتی و امن نا کلہو ءِ تالان کریر۔ دے‘ تُوبے و استارک زمین نا نصیب آ رشک کرسا گل زمین نا خوشی ٹی اوار مرسا مبارکبادی نا روشنا غا کلہو ءِ راہی کریر۔ ترندی اٹ وہوک آ دریاب آک تینا رفتار ءِ لغام خلکر۔

کم و ود اسہ لکھ و بیست و چار ہزار پیغمبر آتا سڑدار نا مبارک آ ولادت آ ڈغار نا مخلوق نبیِ رحمت نا دا فرمان ءِ محسوس کرسا است اٹ قبول کرے۔ 

”کنت نبی وَ آدمُ بین الماءِ و لطین۔“

(مسند احمد حدیث، 20596)

مَٹ: ای ہمو وخت آ ہم نبی ئسٹ کہ آدم دیر و لچخ نا نیام آ ئس۔“

پدا دا ہیت ہم تو پک ءِ کہ رب پاک انا پارہ غان روئے زمین آ ساڑی کل ءِ مخلوق آتیٹی بیرہ انسان ءِ اشرف المخلوقات نا شرفمندی بشخنگانے۔ انسان ہمو مخلوق ءِ ہرادے سوچنگ سرپند مننگ سجفنگ و نوشتہ کننگ نا اسہ خاص ءُ لائخی اسے نا خواجہ کننگانے۔ ہندا سوب ءِ کہ سید المرسلین نا ودی ساہت آن اونا سفت و ستاک خلقت نا زبان اٹ بنا مسر۔ رحمت اللعالمین نا شان و شرف اٹ اولیکو سفتی آ لوز آن نعت انا سفر بنا کرے۔ نعت انا دا مبارک آ سفر چانڑدہ و نیم سد سال آن اینو اسکان ودکی تتون برجا ءِ۔ و کنا دا ایمان ءِ کہ ڈغار نا ٹک آ دنیا نا کل ءِ بولی تیٹی نعت انا دا سفر ودکی اٹ قیامت نا دے اسکان برجا سلو ءِ۔

کنا دوٹی ”نعت انا سفر“ پنی آ کتاب کنا ذوقِ مطالعہ کن بختاوری اسے۔ دا کتاب ءِ براہوئی زبان اٹی پنی آ دانشور، پولکار، شاعر و نوشتکار خواجہ سید علی محمد شاہ ہاشمی چشتی بھاز عرق ریزی و پٹ و پول آن گڈ تصنیف (مرتب) کرسا یکپاسی ٹرسٹ مستونگ نا پارہ غان ادب نا پڑ آ تالان کرینے۔ نعت انا مبارک آ سرحال آ شینک مروک آ دا کتاب 470 پنہ غاتیا تالان ءِ، ہرانا خواننگ آن گڈ دنیا نا جتا جتا زبان آتیٹی نوشتہ مروک آ نعت انا پورو ءُ تاریخ اسے تون واخبی مریک۔

عربی زبان اٹ مسہ دور انا نعتیہ سفر نا ذکر اتون اوار اوار فارسی، اردو، پنجابی، سندھی، سرائیکی، اوغانی، بلوچی، و براہوئی زبان آتیٹی ہم نعت انا پڑ آ مروک آ نوشت آتا تاریخ اسہ ہند آ ننے ہندا کتاب اٹی رسینگک۔ دا اسہ بھاز بھلو دینی و ادبی ءُ خذمت اسے، ہرادے نعتیہ پڑ آ پٹ و پول نا رد اٹ بنداوی ءُ سرسہبی اس پاننگ کینہ۔ دا کتاب بنداو آتیا تخوک انگا ہمو اولیکو سوگو آ خشت ءِ ہرا کہ مون مستی اسہ بڑز ءُ ماڑی اس تفنگ نا وسیلہ مرو ءِ۔ ہراتم مہر انا جوزہ عشق انا مقام نا ہَد و اویل اٹی گام ءِ تخے تو قلم آن پیش تموک آ لوز آتا شان و شرف پین ودسا کاہک۔ و ہمو نوشتوک آ لوز آک قبولیت نا درجہ ءِ ہم دوئی کیرہ۔ خواجہ علی محمد شاہ صاحب نا دینی ادب تون ہُب و مہر اللہ و اللہ نا رسولؐ تون عشق انا معراج نا پاش ءُ شاہدی اسے۔ خوشبو نا سفر آن ہلیس نعت انا سفر اسکان اوفتا کوشست آک سرسہبی نا آسمان ءِ دوئی کرینو۔ ہندن اولیاء اللہ تتون سد ہُب اٹ مہر انا درشانی شاہ صاحب نا شخصیت نا پین زیبا ءُ پہلو اسے۔ خواجہ ابراہیم یکپاسیؒ نا خانوادہ نا سرخیل نا حیثیت اٹ اوفتا علمی فیض بشخنگ ہم براہوئی ادب و براہوئی نوشتوک آتا بختاوری ءِ۔

کتاب ”نعت انا سفر“ نا 9 میکو پنہ غا جوزہ غاتا سفر نا سرحال اٹ پنی آ شاعر ادیب حاجی شاہ بیگ شیدا تینا گچین آ خیال آتا درشانی ءِ کرسا شاہ صاحب نا علمی کاوش آتا امنائی نا رد اٹ شاہ صاحب کن ایم فل و پی ایچ ڈی نا اعزازی ڈگری نا خواست ءِ مون آ ایسنے، دا رد اٹ ای ہم محترم حاجی صاحب نا ہیت اتون امنا کیوہ۔

ہندن 13 میکو پنہ غا راست انگا ہیت انا سرحال اٹ خواجہ آغا علی محمد شاہ صاحب تینا مبارک آ قلم اٹ نعت انا بابت اٹ گپ کرسا کتاب ءِ شینک کننگ نا پورو حوال ءِ بیان کرینے۔ ہراڑان معلوم مریک کہ شاہ صاحب بھلو خواری آن گڈ دا کتاب ءِ مون آ اتنگ اٹ سرسہب مسنے، رب پاک آن دعا ءِ کہ اوفتا دا خواری تے قبولیت نا شرف بشخسا شاہ صاحب کن خیر انا وسیلہ جوڑ کے۔ 

25 میکو پنہ غان 33 میکو پنہ اسکان شاہ صاحب نعت انا سفر نا پن اٹ قرآن شریف و حدیث پاک آن حوالہ ترسا خوانوک آتے کن سرحال ءِ پین آسان کرینے۔ ہندن مون مستی 264 اسکان عربی، فارسی، اردو، پنجابی، سندھی، سرائیکی، پشتو، بلوچی، و براہوئی زبان اٹی نوشتہ مروک آ نعت شریف و نعت گو شاعر آتا بارو اٹ درستی راستی نا وڑ اٹ معلومداری تے کتاب نا بشخ جوڑ کرینے، اخریکو ہیت انا سرحال آ 463میکو پنہ غا شاہ صاحب تینا گچین ءُ نعتیہ کلام اسے تون اوار بروک آ وخت اٹی نعت شریف آ پین کاریم کننگ نا اومیت ءِ درشان کرینے۔ ہندن مون مستی کتاب اٹی مواد آتا حوالہ غاک ہم ساڑی ءُ۔ گڈیکو پنہ غا یکپاسی ٹرسٹ نا کنڈ آن شینک مروک آ کتاب آتا لڑ دا درشانی ءِ کیک کہ یکپاسی ٹرسٹ مستونگ نئے بیرہ اسہ فلاحی ءُ ادارہ اسے، بلکن اسہ اشاعتی ءُ ادارہ اسے نا حیثیت ءِ ہم تخک۔ لڑ انا رد اٹ یکپاسی ٹرسٹ دا وخت اسکان 13 کتاب شینک کرینے، ہرا کہ اسہ بھاز بھلو دینی، ادبی و علمی ءُ خذمت اسے۔

کتاب نا بیک ٹائٹل ءِ سید ذوالفقار علی شاہ ہاشمی انگریزی زبان اٹی نوشتہ کرینے، ہراٹی سید علی محمد شاہ ہاشمی صاحب نا پورو آ درستی راستی رسینگک۔ گڈسر اٹ شاہ صاحب تون اوار اوار حمد، نعت، سیرت و منقبت نوشتہ کروک آ ہر قلم کار کن دعا کیوہ کہ اللہ پاک ساڑی آ وخت اسکان ننا نوشتہ غاتے قبولیت نا شرف بشخے و بروک آ وخت اکن ننا دا ہمت و جوزہ ءِ سلامت تخسا پین ودفے۔

گڈ سر اٹ بیرہ ہندا پاوہ:

خدایا ایں کرم بارے دگر

بارے دگر بارے دگر

ہفتئی تلار

تاک: 35

12-18 September 2020

پنہ، 8